DILI, 10 janeiru 2023 (TATOLI) – Sekretáriu Estadu Juventude no Desportu, Abrão Saldanha, bolu atensaun (Warning) ba Liga Futeból Timor-Leste (LFTL) ho Federasaun Futeból Timor-Leste (FFTL) atu efetua liga époka 2022-2023.
“Liga ba tinan ne´e, ami FFTL garante tenke la´o, SEJD ohin ami enkontru sira fó data ikus mak 31 janeiru, liga la la´o mak sira sei foti desizaun balu hasoru ami, ho nune’e ami esforsu para liga ne’e la´o”, Sekretáriu Jerál FFTL, Grigorio Correia, ba jornalista sira iha edifísiu SEJD, ohin.
Nune’e mak ekipa jestaun kompostu hosi FFTL no LFTL sei tur hamutuk ho klube sira primeira divizaun no segunda divizaun hodi koalia kona-ba jestaun ba orsamentu ne’ebé mak parte rua apoiu.
Sekretáriu FFTL husu ba LFTL atu hala´o atividade administrasaun nian hafoin transfere orsamentu 40%.
“Sira hala´o atividade ruma mak ita transfere osan, ida ne’e osan Governu nian, osan Federation International Football Assosiation (FIFA) nian, ne’ebé servisu seidauk la´o labele halo transferénsia”, refere.
Nia relembra tuir akordu ne’ebé antes ne’e FFTL-LFTL halo tenke transfere uluk osan 40% hosi montante rihun $200 ne’ebé SEJD apoiu ba órgaun liga hodi hala´o servisu administrativu maibé tanba servisu administrativu seidauk la´o mak osan ne’e seidauk bele halo transferénsia.
“LFTL agora hala´o atividade ka lae, atividade seidauk hala´o osan seidauk bele halo transferénsia maibé ohin ami enkontru ona ho SEJD konkorda malu ona, semana ida ne’e nia-laran sira halo rejistrasaun ba jogadór sira, ami bele transfere ona osan ba sira”, revela.
Iha fatin hanesan Prezidente Interinu LFTL, Octavio da Conseição, informa reuniaun ne’ebé SEJD, LFTL no FFTL realiza mak diskute kona-ba modelu kompetisaun liga époka 2022-2023.
Octavio haktuir SEJD husu ba parte rua FFTL-LFTL atu submete kalendarizasaun jogu ne’ebé sei hala´o iha tempu besik.
“Ami koalia hotu ona óinsa FFTL hanesan na’in ba futeból iha Timor-Leste hamutuk ho LFTL atu estabelese kompetisaun regulár, durante ne’e ami iha kefakuman ba lideransa nian mak ohin SEJD husu ba FFTL atu nomea ekipa jestaun ida hodi lidera mekanizmu ou prosesu administrativu ba kompetisaun époka ne’e”, afirma.
“Ohin iha enkontru ne’e reprezentante klube hosi primeira divizaun no segunda divizaun nian iha hotu, hotuhotu iha komitmentu bainhira orsamentu própriu ne’ebé apoiu ba sira, iha ona akordu ruma sira prontu atu ba rejistu no partisipa jogu. Ohin Sekretariu Jeral FFTL mós koalia ona kona-ba finansiamentu ba klube sira no kompremetidu atu finansia ba klube sira hosi primeira divizaun no segunda divizaun”, nia relata.
Totál orsamentu ne’ebé apoiu hosi FFTL no SEJD atu realiza liga hamutuk $440.000.
Jornalista:Hortencio Sanchez
Editór : Zezito Silva
