DILI, 11 janeiru 2023 (TATOLI)–Governu liuhosi reuniaun Konsellu Ministru (KM), kuarta ne’e, aprova projetu dekretu-lei rua ne’ebé aprezenta hosi Ministru Ensinu Superiór, Siénsia no Kultura (MESSK), Longuinhos dos Santos, kona-ba alterasaun dahuluk dekretu-lei númeru 23/2014, loron 03 setembru, ne’ebé aprova estatutu Institutu Nasionál Siénsia no Teknolojia (INCT, sigla portugés).
“Projetu ne’e prevee mós ba kriasaun komisaun étika foun no diresaun nasionál foun sira inklui unidade peskiza idaidak. Hala’o mós adekuasaun ne’ebé di’ak liu atu kontinua halo ninia knaar sira ba defeza siénsia no dezenvolvimentu Timor-Leste,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.
Notísia relevante: INCT prepara instala software atu fasilita matéria sientífika ba peskizadór sira
Nune’e, enkuantu alterasaun dahuluk ba dekretu-lei númeru 22/2016, loron 22 juñu, ne’ebé aprova rejime jurídiku kona-ba depózitu legál publikasaun iha Timor-Leste.
“Ho projetu diploma ida-ne’e, atribui ona ba Institutu Nasionál Siénsia no Teknolojia responsabilidade ida, ho forma tranzitória ka temporária, hodi jere servisu depózitu legál bainhira Biblioteka Nasionál Timor-Leste la hahú ninia funsionamentu ho efetivu,” nia tenik.
Jornalista : Antónia Gusmão
Editora : Julia Chatarina
