DILI, 12 janeiru 2023 (TATOLI) – Prezidente Federasaun Xadres Timor-Leste (FXTL), Zeferino Viegas Tilman, informa federasaun realiza kampionatu nasionál durante loron-tolu iha Salaun Xanana Sport Centre, Bairro dos Grilhos, hodi selesiona atleta nain-haat atu ba partisipa iha jogu SEA Games Kamboja tinan ne’e.
“Kampionatu tinan ida ne’e nia objetivu atu halo selesaun ba atleta potensiál sira ne’ebé sei reprezenta Timor-Leste ba SEA Games agora iha Kamboja fulan maiu”, dehan Zeferino ba jornalista sira iha salaun Xanana Sport Centre, ohin.
Nia dehan totál atleta ne’ebé atu partisipa iha eventu ne’e hamutuk 147, hirak ne´e mai hosi asosiasaun munisipál 13 inklu Rejiaun Administrativu Espesiál Oe-Cusse Ambeno (RAEOA), hosi númeru ne’e, mane hamutuk nain-95, feto seniór nain-27, feto juniór nain-11 no mane juniór hamutuk nain-14.
Sekretáriu Estadu Juventude no Desportu (SEJD), Abrão Saldanha, partisipa no loke direta kampionatu nasionál ne’ebé apoia orsamentu ho montante rihun $20-resin.
“Kampionatu sira nian ne’e loloos halo iha tinan kotuk maibé tanba sira nia orsamentu ita foin mak apoiu iha dezembru, entaun ohin loron sira foin bele realiza kampionatu ne’e, ita tau osan tanba atu promove modalidade Xadres iha SEA Games agora”, dehan Sekretariu Estadu Abrão.
Aleinde prepara atleta ba SEA Games prepara mós atleta ba jogu komunidade koalia lian Portugés (CPLP-sigla Portugés) iha tinan oin.
“Ita tau osan ho montante bo’ot uitoan ne’e tanba atu promove mós atleta juniór sira liuliu idade 14 mai kraik ne’e atu prepara mós ba jogu CPLP iha tinan oin ne’ebé sei hala´o iha Timor-Leste ita mak uma na’in”, revela.
Jornalista:Hortencio Sanchez
Editór : Zezito Silva
