Top

Lei Arte Rituál iha faze konsulta

Sekertáriu Estadu Joventude no Desportu (SEJD), Abrão Saldanha. ImajenTatoli/Egas Cristovão

DILI, 12 janeiru 2023 (TATOLI) – Sekretáriu Estadu Juventude no Desportu (SEJD), Abrão Saldanha, informa, lei atu regula grupu Arte Rituál iha faze konsulta entre Governu ho Arte Rituál 77, Fuan Domin 55, Kolimau 2000 no seluk tan.

“Kona-ba atu kria lei ba regula Arte Rituál sira agora sei iha faze konsulta tanba ami halo ona reuniaun ho Arte Rituál 77, Kolimau-2000, Fuan Domin, 55 no balu tan atu hare maibé sira rasik seidauk iha personalidade jurídiku, ida ne’e mak ita sei haree hela”, Abrão dehan ba Agência TATOLI, iha salaun Xanana Sport Centre Dili, ohin.

Governante husu ba Arte Rituál sira atu halo estatutu atu bele rejistu iha Ministériu Justisa, nune´e bele sai organizasaun ne´ebé legál.

“Agora foin iha faze konsulta entaun seidauk iha opsaun klaru ba sira, ami diskute ona asuntu lubuk ida, Governu halo ona observasaun atu enkuadra sira iha lei foun balu”, nia esplika.

Nia revela, iha 2023 ne’e, Governu sei esforsu maka’as atu finaliza no kria duni lei ba Arte Rituál hirak ne’e tanba durante ne’e grupu hirak ne’e sei hala´o atividade ho ilegalmente.

“Istória Arte Rituál nian ligadu ho rezisténsia nian, balu la´ós hosi rezisténsia, ita tenke halo seletivu ba ida ne’e oinsá mak sira nia enkuadramentu iha lei foun, ida ne’e ma ita tenke halo diskusaun ida ne’ebé kle’an, maibé hakarak ka lakohi Governu iha obrigasaun atu enkuadra sira iha dezenvolvimentu nasionál hodi kria lei balu ba sira”, nia konklui.

Jornalista:Hortencio Sanchez

Editór : Zezito Silva

Publisidade

Leave a Reply

Latest Post

error: Content is protected !!