DILI, 12 janeiru 2023 (TATOLI)–Dirasaun Nasionál Dezenvolvimentu Parque Eskolár Ministériu Edukasaun Juventude no Desportu (DNDPE-MEJD) sei nafatin halo monitorizasaun ba projetu komunitária 110 ne’ebé oras ne’e sei la’o hela iha territóriu nasionál.
Notísia Relevante: Projetu komunitária eskola 13 iha munisípiu lima sofre orsamentu 8,3%
Diretór Nasionál Dezenvolvimentu Parque Eskolár, Agostinho Soares, hateten totál projetu komunitária ne’ebé maka MEJD termina iha tinan kotuk hamutuk 202 no oras ne’e daudaun hela de’it projetu 110 mak sei iha hela faze konstrusaun no reabilitasaun tanba projetu 92 finaliza ona.
“Agora ita sei iha projetu komunitária hamutuk 110 mak iha hela prosesu konstrusaun no reabilitasaun nian laran. Tanba, iha ona projetu komunitária hamutuk 92 mak konklui ona no sei inaugura iha fulan ida-ne’e hosi na’i Primeiru-Ministru, Taur Mata Ruak, iha munisípiu Baucau.” Nia hateten ba Agência Tatoli iha ninia gabinete dirssaun Parque Eskolár MEJD Vila Verde, kinta ne’e.
Hosi projetu komunitária 202 ne’ebé kuaze 92 konklui daudaun ne’e fahe ba kategoria tolu, projetu komunitária iha 85 no kapitál dezenvolvimentu iha projetu neen (6) no bens servisu iha projetu ida (1).
Hosi projetu komunitária 85 ne’ebé kuaze 81 hosi edukasaun pre-eskolár, ensinu báziku sentrál no filiál no mós eskola haat hosi ensinu sekundáriu rua (2) no ensinu tékniku vokasionál rua (2).
“Ha’u hakarak dehan projetu komunitária 85 ne’ebé konklui daudaun ne’e ita identifika eskola ensinu sekundáriu jerál (ESG) iha rua mak ESG Kay Rala Manatuto no ESG Seran-Kotek Covalima, inklui ensinu sekundáriu Tékniku Vokasionál rua (2) mak hanesan 28 novembru Becora no Tékniku Vokasionál Malibaka Bobonaro,” nia dehan.
Ho nune’e, eskola 92 maka preparadu ona atu halo primeira lansamentu inaugurasaun ne’e DNDPR sei prepara plaka depois atu husu disponibilidade asinatura hosi Primeiru-Ministru hodi distribui ba eskola sira-ne’ebé konklui ona, atu nune’e ministru sira-ne’ebé mak hetan orientasaun PM nian bele ba inaugura eskola hirak ne’e.
Notísia Relevante: MEJD no ADN konkorda rezolve projetu komunitáriu
Jornalista : Tomé Amado
Editór : Cancio Ximenes
