DILI, 13 janeiru 2023 (TATOLI)—Komisaun C trata asuntu Finansa Públika iha Parlamentu Nasionál (PN), tau ona kalendáriu ajenda iha loron 24 janeiru ne’e hahú halo audiénsia públika ba proposta-lei Finansa Munisipál.
Notísia Relavante: Komisaun C sei halo audiénsia públika proposta-lei Finansa Munisipál
Prezidente komisaun C, Maria Angelica Rangel, hateten proposta-lei ne’e meza plenária baixa mai iha komisaun simu iha setembru 2022, iha loron 30 nia laran atu fó apresiasaun inisiál maibé tuir regra bele extende tanba antes ne’e iha hela debate OJE 2023.
“Nune’e halo pedidu ba Prezidente Parlamentu extende to’o mai iha fulan janeiru, no horisehik ami halo ona kalendáriu tentativa envia ba Prezidente Parlamentu atu aprova. Iha kalendáriu ne’e, ami sei ba debate halo audiénsia públiku atu ba jeneralidade durante loron tolu hahú 24-26 janeiru 2023,” Prezidente Komisaun C ne’e hateten ba Agêmcia Tatoli iha Parlamentu Nasionál, sesta ne’e.
Nune’e, tuir nia, iha audiénsia públika ne’e Komisaun C sei konvida lei-na’in mak proposta Governu nian hosi Ministéiru Administrasaun Estatál (MAE).
Proposta-lei ne’e ko’alia mós kona-ba finansa entaun ligasaun entre Ministéiru Finansa (MF), ho mós Ministéiru Petróliu no Minerál (MPM) hanesan ministéiru ne’ebé bele rekolla reseita, entaun sei konvida ministéiru tolu refere.
Tuir ajenda, aprovasaun ba jeneralidade ne’e iha 06 fevereiru 2023, hafoin Prezidente PN baixa fila-fali hodi halo fali diskusaun ba iha espesialidade ne’ebé sei haree fali kalendáriu foun.
“Espera iha fulan fevereiru no marsu nia laran, lei ne’e bele konklui ona. Tan ne’e, komisaun sei fó prioridade ba debate to’o iha marsu bele aprova ona iha finál global,” nia otimista.
Deputada ne’e esplika, konteúdu lei ne’e iha ligasaun barak iha Lei Enkuadramentu Orsamentu (LEO) hodi ajusta de’it ba iha munisípiu sira bele iha regra rasik no mós rekolla reseita.
Jornalista : Nelson de Sousa
Editór : Cancio Ximenes
