DILI, 13 janeiru 2023 (TATOLI)--Autoridade Aduaneira (AA)/Alfándega simu pedidu hosi setór privadu hodi husu autorizasaun hatama kontentór hosi Atapupu, Indonézia mai territóriu Timor-Leste.
“Iha pedidu hosi empreza sira atu hatama kontentór via terrestre, maibé ha’u la fó autorizasaun tanba kondisaun fronteira seidauk di’ak. Ita-nia estrada sira seidauk iha lei atu regula kona-ba kuantidade hira mak bele halo sirkulasaun, entaun bainhira kontentór boot ho volume tonelada boot mai estraga estrada, ita mak sei hasai osan hodi hadi’a,” Komisáriu Alfándega, José António Abílio Fátima, hateten liuhosi programa entrevista eskluziva, iha estúdiu Agência Tatoli, I.P, Farol, foin lalais ne’e.
Razaun Alfándega seidauk autoriza tanba seidauk iha kondisaun no presiza haree lai enkuadramentu legál, ne’ebé sei haree prosedimentu hotu mak bele autoriza maibé daudaun seidauk bele autoriza.
Notísia relevante: Alfándega identifika seidauk iha sasán importasaun foun tama hosi portuária-fronteira
Kontentór sira daudaun tama hosi Portu Tibar ne’ebé Governu halo investimentu liuhosi projetu parseria públiku privadu (PPP).
“Hanesan setór privadu, ita tenke apoiu Governu nia investimentu. Ita labele oho fali Governu nia investimentu no buka atrai hosi fatin seluk. Loos duni katak livre ba timor-oan sé de’it atu halo negósiu, maibé nu’udar timor-oan sente oinsá? bainhira nia sente nasionalizmu no patriotizmu maibé la valoriza investimentu ne’e, nasaun rasik halo maibé buka meiu atu hamate fali ne’e sentimentu nu’udar timor-oan laiha ona,” nia fó hanoin.
Maski nune’e, Komisáriu dehan, situasaun ne’e seidauk akontese tanba foin pedidu de’it no haree fali ba movimentu via terrestre aumenta, tanba iha dezembru 2022 Governu liuhosi Ministériu Finansa halo inaugurasaun ba mákina x-ray hodi prienxe kondisaun bainhira transporte boot sira tama liuhosi fronteira terrestre, ne’ebé ein termu kamioneta tula kargu aumenta, maibé kontentór AA seidauk aprova.
Jornalista : Antónia Gusmão
Editora : Julia Chatarina
