DILI, 13 janeiru 2023 (TATOLI)–Ministériu Edukasaun Juventude no Desportu (MEJD) identifika ona eskola ensinu sekundáriu Tékniku Vokasionál (TEKVOK) liu 10 mak ameasa sei taka inklui Eskola Ensinu Sekundáriu Tékniku Vokasionál Hera mós atu taka.
Notísia Relevante: Konstrusaun eskola tékniku vokasionál Hera atinje ona 20%
Diretór Servisu Edukasaun Munisípiu Dili (DSEMD), Carlito Soares, informa MEJD halo ona identifikasaun ba eskola TEKVOK Hera ne’e tanba akompaña durante eskola ne’e eziste kada tinan númeru estudante menus, depois eskola ne’e mós ninia distánsia Dili-Hera dook tanba ne’e Governu hanoin atu taka hodi transforma fila-fali ba eskola ensinu sekundáriu jerál (ESG, sigla portugés).
“Ita haree hosi númeru estudante de’it menus loos. Ema ladún iha inteerese atu tama iha eskola TEKVOK Hera. Depois ninia distánsia mós dook halo ita-nia oan sira hosi Dili atu tama iha eskola ne’e mós hanoin barak. Entaun, kada tinan númeru estudante tuun ba beibeik, ne’eduni ita-nia Governu deside hakarak taka tiha hodi loke fali eskola ESG foun,” Carlito Soares hateten ba Agência Tatoli iha nia kna’ar fatin, Comoro, sesta ne’e.
Tanba, nia dehan, eskola TEKVOK Hera ne’e mós agora daudaun ninia fasilidade la kompletu, depois kondisaun eskola mós mota sobu tiha ona no sala-de-aula ida hosi departamentu Komérsiu ho hariis fatin no agora komesa fó tan ameasa ba edifísiu departamentu kontabilidade nian.
Ne’eduni, desizaun Ministériu nian atu transforma fila-fali Eskola TEKVOK Hera ba ESG ne’e. tuir Diretór Carlito hateten halo ona konfirmasaun no konsultasaun ho parte hotu-hotu liu-liu tékniku sira hodi hetan konkluzaun ba desizaun ida-ne’e.
Diretór Eskola Ensinu Sekundáriu Tékniku Vokasionál (TEKVOK) Hera, António Pinto, mós reforsa katak nia simu ona informasaun hosi parte Ministériu Edukasaun katak atu halo transformasaun eskola ne’e ba ESG maibé seidauk hatene bainhira.
“Sira hosi Ministériu, telefone ona ha’u katak anu letivu foun ne’e hahú ona ho ensinu sekundáriu jerál. Maibé, ate a data ha’u seidauk simu despaixu ida,” nia dehan.
Ba ninia parte laiha problema ho transformasaun eskola TEKVOK Hera sai fali ESG tanba estatutu mak muda maibé eskola kontinua la’o nafatin, labarik sira hetan nafatin direitu hodi estuda no aprende nafatin.
Eskola TEKVOK Hera ne’ebé tempu besik sei transforma ne’e, agora halo hela atividade orientasaun ba estudante foun na’in-46, depois orientasaun ramata mak sira sei kolokasaun estudante sira tuir departamentu Siénsia Teknolojia (CT) no Siénsia Sosiál Humana (CSH).
Entretantu iha munisípiu Ermera, MEJD identifika ona atu taka mós eskola Tékniku Vokasionál Toli hanesan Ensinu Sekundáriu Tékniku Vokasionál (ESTV) Calbale Lauana Lete-Foho, Ensinu Sekundáriu Tékniku Vokasionál (ESTV) Raicala Ermera no Ensinu Sekundáriu Tékniku Vokasionál (ESTV) Reman Bote Atsabe, ne’ebé ajénsia balun mak harii, agora hein de’it despaixu Ministériu nia tun bele transforma ona ba ensinu sekundáriu jerál.
Notísia Relevante: MEJD avalia ezisténsia eskola tékniku vokasionál hamutuk 59
Jornalista : Tomé Amado
Editór : Cancio Ximenes
