DILI, 13 janeiru 2023 (TATOLI)–Ministru Edukasaun Juventude no Desportu (MEJD), Armindo Maia, garante katak iha semana oin ne’e estudante mellór klasifikadu 3.500 sei asesu bolsa méritu.
Notísia Relevente: Estudante 3.517 tama lista mellór klasifikadu atu simu prémiu bolsa méritu
Planu atu apoiu bolsa méritu ba estudante mellór klasifikadu sira-ne’e reforsa ona ho orsamentu ne’ebé Ministériu Edukasaun prevee hamutuk millaun $7,2, maibé durante ne’e seidauk bele transfere ba konta bankária estudante sira-nian tanba sei iha hela fallansu balun.
“Bolsa méritu ita sei aserta hela ho naran no valór sira balun ne’ebé seidauk tama ka seidauk loos. Ha’u bele garante katak semana oin ita bele rezolve ona atu ita nia labarik sira bele hetan ona sira-nia direitu ba bolsa méritu ne’e,” Governante ne’e hateten ba Agência Tatoli iha Palásiu Governu, sesta ne’e.
Diretór Servisu Edukasaun Munisípiu Dili (DSEMD), Carlito Soares, hateten estudante sira- ne’ebé tama iha mellór klasifikadu atu hetan bolsa méritu iha Munisípiu Dili hamutuk na’in-194.
Hosi totál númeru 194 ne’e, estudante ne’ebé hetan bolsa méritu ne’e mak fahe ba ensinu báziku hosi segundu siklu iha na’in-81, ensinu báziku terseiru siklu iha na’in-80, ensinu sekundáriu jerál iha na’in-24 no ensinu sekundáriu tékniku vokasionál iha na’in-sia (9).
“Ha’u hakarak dehan totál estudante mellór klasifikadu 194 foti de’it hosi estudante pasajen de klase ba estudante finalista seidauk tama, tanba eskola presiza mós dadus fiksu hosi Ministériu Edukasaun ne’ebé sei submete hosi diresaun Kurríkulu nasionál,” nia dehan.
Dadus estudante pasajen de klase ne’ebé sai mellór klasifikadu ne’e Servisu Edukasaun Munisípiu Dili submete hotu ona ba Ministériu Edukasaun inklui valór estudante sira-nian atu fasilita dirasaun kompetente hodi halo ninia servisu atu klasifika estudante sira-ninia pozisaun hosi primeiru lugar to’o kintu lugar bazea ba valór sira.
Nune’e, direitu labarik sira-nian atu hetan bolsa méritu ne’e konsidera nafatin tanba ne’e mak agora sira hahú loke ona konta bankária, atu nune’e bainhira asuntu bolsa méritu ne’e mak rezolve ona entaun Ministériu Edukasaun bele halo ona transferénsia osan ba ida-idak ninia konta bankária.
Jornalista : Tomé Amado
Editór : Cancio Ximenes
Hau nudar estudante ida w hato w Nia obrigado 🙏
Maibe w mos sei iha konfusaun ba iha Melhor Klasifikasaun?. No w presija informasaun ruma nebe ho klean liu tan konaba oinsa ou maneira sda deit mak Edukasaun sira uza atu hatene konaba melhor Klasifikasaun ba iha Eskola hotu hotu??
No ba ema sira nebe mak hetan melhor Klasifikasaun ne husi eskola mak fo valor ba Edukasaun kah Husi Edukasaun mak fo valor ba eskola??