DILI, 13 janeiru 2023 (TATOLI) – Prezidente Federasaun Voliból Timor-Leste (FVTL), Inosencio de Araujo da Silva, informa FVTL sei haruka ekipa rua hodi kompete iha jogu SEA Games Kamboja 2023.
“SEA Games agora ne’e, Voliból indoor, la partisipa, só Voliból praia mak partisipa, entaun ita prepara ona ekipa tolu kompostu hosi ema na’in neen, mesak mane de’it, ekipa tolu ne’e halo hela preparativu durante tinan kotuk maibé ita sei selesiona no sei haruka ekipa rua de’it mak ba”, Inosencio de Araujo da Silva, hateten ba jornalista sira iha edifísiu Komite Olímpiku Nasionál Timor-Leste, ohin.
Tuir nia hosi ekipa rua ne´e kompostu hosi ema nain-haat ne´ebé selesionadu iha fulan abríl mak ba kompete iha SEA Games.
“Bainhira halo selesaun ikus, ekipa tolu ne’e sei halo jogu kontra malu, ekipa ne’ebé mak sai hanesan primeiru lugar no segundu lugar mak sei kompete iha SEA Games, maibé ekipa ida terseiru lugar ne’e ita tau hanesan rezerva bainhira loron besik mak ekipa rua ne’e ida hetan fallansu, entaun hein substitui”, revela nia.
Nia dehan daudaun ne’e ekipa tolu tuir hela formasaun iha kampu Voliból praia Lecidere Dili.
Inosencio garante katak preparativu ne´ebé másimu sei hatudu prestasaun di´ak iha SEA Games.
Jornalista: Hortencio Sanchez
Editór : Zezito Silva
