DILI, 13 janeiru 2023 (TATOLI) – Kongresu ordináriu ne’ebé realiza hosi Fedrasaun Boxe Amadora Timor-Leste (FBATL), iha salaun edifísiu Komite Olímpiku Nasionál Timor-Leste (CONTL-sigla Portugés), Januario da Silva Britol eleitu ba Prezidente no Rogerio Amaral Soares sai Sekretáriu Jerál ba período 2023-2027.
Prezidente Januario subliña iha ámbitu kongresu aprezenta ajenda importante tolu mak kongresista no meza asembleia diskute rejimentu interna FBTL, votasaun ba hili estrutura foun no tomada posse ba estrutura foun.
Tuir nia iha prosesu kongresu kongresista sira deside apezenta pakote úniku, Prezidente mak Januario da Silva no nia Sekretariu Jeral Rogerio Amaral Soares. iha votasaun pakote úniku ne’e manán ho votu aklamasaun hamutuk 33 hosi asosiasaun Boxe munisipiu sia, klube 22 no asosiasaun árbitrajen ida hodi troka kedan estrutura anteriór ne’ebé lidera hosi Prezidente Abrão Quintas ne’ebé antes ne’e deside rezigna aan iha tinan kotuk.
Nia friza katak kongresu ne´e hetan prezensa hosi assosiasaun munisipiu sia mak hanesan Ermera, Manatuto, Aileu, Oe-Cusse, Baucau, Viqueque, Lautem no Bobonaro no assosiasaun árbitrajen ida, nune´e mós iha klube 22 ne’e mak Oriental Boxe, Benfica Boxe, El-Matador, Mascarinhas Boxe, Fomento Boxe, Colmera Boxe, Bairro Pite Boxe, MM BC Boxe,Bidau Masau Boxe, União Bidau Boxe, BTB Boxe, Scorpion Boxe, ABBA Boxe, Rumbia Boxe, Lorico Boxe, Jovia Boxe, Dili Boxe, Farol Boxe, DLBC Boxe no Força Boxe.
Bainhira hetan konfiansa hosi assosiasaun no klube sira, Januario compromete kontinua hatutan servisu sira ne´ebé durante la´o no prioritariu liu mak dezenvolve FBATL sai di´ak liután
“Durante ha’u nia mandatu sei hamutuk ho parte hotu atu dezenvolve Boxe ne’e ba oin, programa prioridade ha’u nian mak ne’e tenke treinadór hosi internasionál mak mai fó formasaun ba ita nia atleta sira atu eleva liután atleta sira nia koñesimentu, nune’e sira nia prestasaun bele sai di’ak liu”, Prezidente afirma hafoin kongresu remata.
Aleinde ne’e, nia sei servisu makas iha parte aprosimasaun ba federasaun boxe internasionál sira atu apoiu mós finansiamentu, atu nune’e hamenus dependénsia FBATL nian ba Governu.
“Ita sei halo lobi ho federasaun internasionál atu husu sira nia tulun liuhosi finansiamentu atu hala´o atividade, lori ita nia atleta sira ba treinu iha internasionál halo jogu amizade barak iha rai laran no liur ikus liu atu hamenus ita nia dependénsia ba Governu, Governu bele ajuda mais labele barak liu, se Governu 75%, federasaun 25% hanesan ne’e”, revela nia.
Prezidente eleitu mós rekoñese estrutura anteriór sira nia servisu ne’ebé durante ne’e fó susesu ba Timor-Leste, hanesan tinan 2021 hetan medalla osan metan iha Filipina no iha tinan 2022 hetan medalla osan mutin ida, metan ida iha Vietname.
“Iha ha’u nia lideransa sei esforsu atu hetan mós medalla hanesan ne’e maibé presiza parte hotu servisu hamutuk, servisu apoiu malu”, hakotu nia.
Iha fatin hanesan, Reprezentante Asosiasaun hosi Reziaun Administrativu Espesial Oe-Cusse Ambeno (RAEOA), Francisco Pinto, husu ba estrutura eleitu atu halo servisu ne’ebé másimu atu lori FBATL ba oin.
“Ami husu ba estrutura foun atu servisu ho másimu hodi dezenvolve boxe ne’e ba oin ho di’ak”, Francisco dehan.
Jornalista: Hortencio Sanchez
Editór : Zezito Silva
