DILI, 13 janeiru 2023 (TATOLI)–Diretór Nasionál Dezenvolvimentu Parque Eskolár (DNDPE), Agostinho Soares, konsidera katak progresu konstrusaun fíziku ba eskola ensinu sekundáriu tékniku vokasionál (TEKVOK) Rabina Lakluta, munisípiu Viqueque atinje ona 78%.
Notísia Relevante: DNDPE konklui ona projetu kapitál dezenvolvimentu hitu iha munisípiu lima
Progresu konstrusaun eskola TEKVOK ne’e depende ba kondisaun no situasaun natureza, maibé kompañia sira garante ona katak bainhira laiha impedimentu iha fulan ida-ne’e, konstrusaun ne’e sei konklui iha fulan-fevereiru nia rohan.
“Ita-nia kompañia sira-ne’ebé kaer obra no halo konstrusaun ba eskola TEKVOK Rabina garante ona katak se laiha udan iha fulan ida-ne’e mak sira promete fulan ikus fevereiru tinan ida-ne’e bele entrega ona edifísiu eskola ne’e ba MEJD hodi halo preparasaun ba inaugurasaun,” nia hateten ba Agência Tatoli iha nia kna’ar fatin, Vila Verde, sesta ne’e.
Konstrusaun fíziku atinje ona 78% maibé daudaun ne’e materiál konstrusaun sira-ne’ebé prepara ba konstrusaun edifísiu hodi prepara ba metade obra ne’e mak badaen sira lalin de’it, tanba kondisaun no situasaun iha area refere la garante.
Maibé, nia dehan, bainhira loron rua nia laran mak udan la monu rai mak kompañia bele asesu ona hodi transporta materiál sira ba to’o kedan iha fatin konstrusaun.
Ministériu Edukasaun liuhosi DNDPE halo ona notifikasaun ba kompañia sira-ne’ebé kaer hela prosesu konstrusaun ba eskola TEKVOK 13 ne’e, maibé kona ba finanseiru laiha problema.
Preokupasaun kompañia sira-nian mak kona-ba asesu transporte de’it, tanba ne’e DNDPE nafatin fó korajen atu kompañia sira kontinua servisu ho responsabilidade maibé tenke kuidadu mós situasaun.
Projetu konstrusaun eskola Tékniku Vokasionál sira-ne’ebé mak la’o iha territóriu nasionál ne’e kuaze iha projetu 20 mak mai hosi kapitál dezenvolvimentu no agora daudaun iha ona projetu hitu (7) mak konklui ona, agora falta tan projetu 13 mak sei iha hela faze konstrusaun.
Jornalista : Tomé Amado
Editór : Cancio Ximenes
