Servisu Edukasaun Dili kontinua simu estudante 344 hosi munisípiu
DILI. 13 janeiru 2023 (TATOLI)–Diretór Servisu Edukasaun Munisípiu Dili, Carlito Soares, hateten maske Ministériu Edukasaun Juventude no Desportu (MEJD) hatún ona sirkulár ba eskola iha Kapitál Dili atu labele simu tan estudante sira hosi munisípiu maibé realidade eskola sira simu nafatin.
Notísia Relevante: ESG 4 Setembru Balide simu estudante 80-resin hosi munisipiu
Nia hatutan, Dirasaun Servisu Edukasaun Munisípiu Dili (DSEMD) tinan ida-ne’e kontinua fó nafatin oportunidade ba estudante 344 hosi munisípiu bele eskola iha Dili maibé tenke ho razaun ne’ebé fundamentál.
“Tinan ida-ne’e ita kontinua simu estudante hosi munisípiu no fó ona rekomendasaun ba estudante 344 hosi munisípiu hodi tama iha eskola sira iha Dili, tanba sira iha razaun fundamentál. Estudante sira-ne’e ita halo klasifikasaun iha estudante na’in-321 mak tama iha ensinu sekundáriu jerál no na’in 23 tama iha ensinu báziku,” Diretór ne’e hateten ba Agência Tatoli iha ninia kna’ar fatin Comoro, sesta ne’e.
Estudante na’in-344 ne’e, Dirasaun Servisu Edukasaun Dili rekomenda ona ba eskola sira mak hanesan ensinu sekundáriu jerál (ESG, sigla portugés) 10 Dezembru Comoro, ESG 4 Setembru UNAMET Balide, ESG 12 novembru Becora, ESG 5 de Maio Becora no mós eskola Ensinu Báziku Fatumeta.
Dirasaun Servisu Edukasaun Dili fó oportunidade ba estudante 344 hosi munisípiu kontinua eskola iha Dili ne’e, tanba iha razaun fundamentál hanesan timoroan lakohi atu impede direitu labarik sira-nian atu asesu ba edukasaun.
Notísia Relevante: PN konsidera sirkulár MEJD limita ema-nia liberdade asesu eskola
Estudante sira ne’e tun mai Dili, tanba inan-aman mate ona no ema seluk mak tau matan ba sira entaun estudante sira-ne’e tenke mai eskola iha Dili, tuir rekomendasaun hosi ema-ne’ebé hakarak tulun sira.
Iha estudante balun sira nia inan-aman sei moris hela maibé atu asesu ba eskola ne’e mak tenke la’o ain kilómetru haat (4) to’o lima (5), entaun sira hakarak eskola ne’e Governu tenke fasilita hodi nune’e labele viola fila-fali sira-nia direitu
Entretantu, iha tinan kotuk, kuaze estudante hosi munisípiu hamutuk 800-resin mak eskola iha Dili no estudante sira-ne’e barak mak eskola iha 04 Setembru UNAMET Balide, entaun dala barak fó impaktu ba eskola tanba númeru estudante sa’e makaas no halo eskola difisil atu kontrola estudante sira.
Ne’eduni, nia dehan, edukasaun Dili foti desizaun hodi husu ba Ministériu Edukasaun atu hatún despaxu ida hodi labele simu tan estudante hosi munisípiu atu eskola iha Dili.
Notísia Relevante: MEJD hasai sirkulár ho pontu importante tolu ba eskola hotu
Jornalista : Tomé Amado
Editór : Cancio Ximenes
