Top

Labarik 500-resin mak treinu iha Sentru Juvenil FFTL

Diretór tekniku FFTL Gaspar Quintão. Imajen Tatoli/Horetencio Sanchez

DILI, 16 janeiru 2023 (TATOLI) – Diretór Tékniku Federasaun Futeból Timor-Leste (FFTL), Gaspar Quintão, relata tuir dadus ne’ebé iha, labarik 500-resin mak daudaun ne’e halo hela treinu iha Sentru Juvenil FFTL nian.

“Númeru ne’ebé iha ne’e la´os iha de’it Dili maibé hosi asosiasaun sira iha munisípiu hotu, sira agora hahú ona treinamentu hafoin ita ferias ba natal no tinan foun, sira tama iha semana kotuk”, Diretór ne’e ba Agência TATOLI iha edifísiu FFTL, ohin.

Nia revela federasaun forma ona ekipa ida atu identifika jogadór hosi munisípiu 13 inklui Reziaun Administrativa Espesial Oe-Cusse Ambeno (RAEOA) hodi prepara ba futuru.

Oráriu treinamentu ba labarik sira kuaze hanesan iha teritóriu nasionál, dader no loraik bazea ba labarik sira nia oráriu eskola, balu eskola loraik treinamentu iha dader no balu eskola dader treinamentu loraik.

Maske lista ba labarik sira fiksu ona maibé FFTL la taka dalan ba labarik seluk ne’ebé hakarak voluntariamente ba treinu. Atu treinadór sira hare di’ak bele foti tama hanesan jogadór juvenil FFTL nian.

Nia subliña treinadór hamutuk na’in 12 mak fó hela treinamentu ba labarik sira iha Dili no kada munisípiu balu treinadór ida ou rua.

Progresu hosi Sentru Juvenil FFTL nian konsege prodúz ona jogadór besik atus ona, balun daudaun ne’e tama ona ba selesaun nasionál juniór no seniór, balun klube futeból sira primeira divizaun no segunda divizaun hodi foti sai hanesan sira nia jogadór iha klube.

Tuir dadus tinan kotuk labarik besik 400 mak hanesan jogadór Sentru Juvenil FFTL nian no tinan ne’e sae ona ba 500-resin, labarik hirak ne’e maioria idade hosi 8-12.

“Objetivu ami nian ne’e prepara jogadór sira ne’e hanesan fini ba FFTL, atu nune’e bele prepara jogadór Timor-Leste nian iha futuru, ne’ebé kada tinan ami sempre halo rejistrasaun no la taka dalan ba hirak ne’ebé mai voluntáriu”, hakotu nia.

Jornalista:Hortencio Sanchez

Editór : Zezito Silva

Publisidade

Leave a Reply

Latest Post

error: Content is protected !!