DILI, 16 janeiru 2023 (TATOLI)–Ministru Edukasaun Juventude no Desportu (MEJD), Armindo Maia, hateten tinan ida-ne’e konsidera nu’udar tinan polítika, tanba ne’e profesór sira labele abandona estudanta maibé tenke hatudu responsabilidade nafatin hodi akompaña estudante sira iha prosesu ensinu aprendizajen.
Notísia Relevante: Ministru Edukasaun halo abertura ba ensinu aprendizajen tinan letivu 2023
“Ha’u husu nafatin nu’udar mestre no funsionáriu iha Ministériu Edukasaun atu nafatin konsentra imi-nia atensaun ba imi-nia kna’ar nu’udar mestre ka profesór. Labele husik hela labarik sira mangame hela iha eskola laran, mestre sira ba tuir tiha kampaña. Favor, ida-ne’e labele akontese ba ita-boot sira,” Governante ne’e hateetn iha serimónia abertura anu letivu prosesu ensinu aprendizajen ne’ebé realiza iha eskola ESG 4 setembru UNAMET Balide, segunda ne’e.
Hanesan membru Governu ne’ebé lidera Ministériu Edukasaun, buka atu kria kondisaun ne’ebé di’ak atu ema hotu bele kontinua hala’o sira nia kna’ar ne’ebé importante liu atu dezenvolve edukasaun ida di’akliu tuir misaun ne’ebé eroi sira husik hela.
Tanba, nia dehan, knaar prinsipál profesór ka mestre sira nia maka atu hanorin no akompaña alunu sira durante oras eskola nian, bainhira labarik sira sai vítima ne’e responsabilidade ema hotu nian inklui Ministru Edukasaun nian mai to’o iha dirijente eskola sira-ne’ebé iha baze.
Ida-ne’e hatudu katak VIII Governu Konstitusionál hakarak tau duni prioridade ba edukasaun, tanba edukasaun mak sai xave ba dezenvolvimentu nasaun ida-ne’e nian, maske rai Timor ne’e bele iha riku oioin hanesan mina-rai, osan-mean, osan-muti maibé laiha rekursu umanu ida adekuadu ka ema matenek nasaun TL sei marka pasu.
“Ha’u husu ba dirijente sira hotu ne’ebé mak envolve iha edukasaun hahú husi nivél sentrál nasionál munisipál tun to’o kraik, diretór edukasaun, diretór eskola mestre no inan-aman sira hotu iha territóriu nasionál atu kontinua motiva ka apoia ita-nia oan sira hodi bele hetan edukasaun ida di’ak,” nia dehan.
Ministru Edukasaun ne’e hateten, iha tinan 2023 ne’e konsidera nu’udar tinan polítika ne’ebé sei iha eventu importante rua mak sei akontese hanesan eleisaun parlamentár no eleisaun ba xefe suku, nune’e hanesan sidadaun no hanesan timoroan ema ida-idak iha direitu atu partisipa iha prosesu eleisaun hodi ezerse sira-nia direitu votu.
Jornalista : Tomé Amado
Editór : Cancio Ximenes
