Obra Públika Baucau husu ministériu foti desizaun ba kompañia responsável estrada Fatulia
BAUCAU, 18 janeiru 2023 (TATOLI) – Servisu Munisipál Obra Públika Baucau husu Ministériu Obra Públika (MOP) hapara kontratu kompañia responsável estrada suku Fatulia, postu administrativu Venilale tanba laiha progresu.
Diretór Servisu Munisipál Obra Públika Baucau, Pedro Alexandre Guterres Perreira, esplika, projetu refere ajudikasaun dereita iha tempu VI Governu Konstitusionál ne’ebé responsável hosi kompañia Ruvic Construction unipesóal. Lda iha ho durasaun servisu hosi fulan-setembru 2016 to’o setembru 2017.
“Ita hakarak ne’e bainhira ministériu deside, iha progresu atu kontinua la buat ida ka iha hanoin atu hapara, labele obra ne’e laiha serteza tanba tinan naruk ona agora husik hela deit,” Diretór Servisu Munisipál Obra Públika Baucau hateten iha Vila Nova, kuarta ne’e.
Bainhira asina kontratu kompañia refere realibilita pakote ida purvolta kilómetru 10.3. Enkuantu pakote tolu seluk fahe ba kompañia seluk hosi totál pakote haat hahú iha postu Venilale ba suku Fatulia toyo aldeia Osouaque, kontinua ba suku Uaimori, postu administrativu Ossu, munisípiu Viqueque hamutuk kilómetru 27.
Obra públika Baucau identifika fukun hosi obra refere maihosi parte kompañia tanba utiliza materiál probasse tuir dezeñu no Bill of Quantity (BoQ) ne’ebé importadu hosi Malázia nune’e prezudika reabilitasaun estrada to’o ohin loron seidauk finaliza.
Enkuantu fim tinan-2022, progresu obra refere foin atinje pursentu 30 ne’ebé parte kompañia hetan ona pagamentu hamutuk pursentu 25 ho orsamentu $1.272.120,82 (millaun $1-resin) hosi totál valór kontratu hamutuk $4.897.736,09 (millaun $4-resin).
“Prezudika tebes tanba ita hakarak hadi’a estrada diresaun ne’ebá maibé agora labele,” Pedro Alexandre akresenta.
Servisu Obra Públika Baucau husu atu komunidade kontinua pasiénsia hodi hein parte kompetente rezolve problema obra reabilitasaun estrada iha área Venilale ba suku Fatulia to’o aldeia Osouaque inklui suku Uaimori, postu Ossu, munisípiu Viqueque.
Jornalista : Natalino Belo
Editór : Evaristo Soares Martins
