SEJD-CDTL hein matadalan kompetisaun SEA Games

DILI, 18 janeiru 2023 (TATOLI) – Konfederasaun Desportiva Timor-Leste (CDTL-sigla portugés), ho Sekretaria Estadu Juventude no Desportu (SEJD) seidauk bele halo lansamentu ba atleta hosi modalidade ualu ne’ebé prepara atu ba kompete jogu SEA Games tanba sei hein matadalan hosi komisaun organizadór ba eventu ne’e hosi Kamboja.
“CDTL ho SEJD no Komite Olímpiku Nasionál Timor-Leste (CONTL-sigla portugés), tur hamutuk ona iha semana kotuk kona-ba preparasaun lansamentu ofisiál ba atleta sira ne’ebé atu kompete iha SEA Games Kamboja. Hosi enkontru ne’e identifika katak uma na’in Kamboja sei iha hela prosesu atu prodúz matadalan kona-ba kompetisaun”, Prezidente CDTL, Macario Sanches hateten ne’e ba jornalista sira iha edifísiu CDTL, Jinaziu, ohin.
Matadalan ne´e ho objetivu atu uza durante époka SEA Games. Ida ne´e hanesan regra hodi gia atleta sira hotu no ema hotu ne’ebé ba kompete iha jogu rejionál ne’e.
“Iha diskusaun, ita konkorda hotu katak hein to’o ekipa Timor-Leste iha 22 janeiru agora ba enkontru ho nasaun membru 10 ne’ebé sei partisipa iha eventu ne’e iha Kamboja, rona buat hotu los ona mak ita foin bele halo lansamentu ofisiál ba atleta sira hodi halo preparasaun”, relata nia.
Maibé daudaun ne’e, CDTL alerta ona ba federasaun ualu ne’ebé atu kompete iha eventu ne’e bele prepara ona sira nia atleta iha ida-idak nia fatin bainhira halo ona lansamentu mak foin bele tau sira iha fatin espesiál hodi fó formasaun ne’ebé másimu.
“Ne’e mak ami hanoin katak delega ona kompeténsia ba federasaun sira, atu nune’e sira hahú tuir sira nia kapasidade no disponibilidade atu hahú ona preparasaun ba atleta sira”, haklaken nia.
Modalidade ualu ne’ebé CDTL fó sai ona atu kompete iha eventu ne’e mak hanesan futeból, voleiból praia, xadres, siklizmu, karate-do, atletizmu no Boxe.
Jornalista:Hortencio Sanchez
Editór : Zezito Silva

