OÉ-CUSSE, 19 janeiru 2023 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), lideradu Arsénio Paixão Bano, sei husu ba empreza ne’ebé konstrui estrada ligasaun suku Bobokase ba bairru Kutete, suku Costa hodi hadi’a fila-fali tanba hetan estragu hosi dezastre naturál.
“Ohin, ha’u liuhosi fatin ne’e ita haree tiha ona tanba iha kondisaun dezastre rai maka ladi’ak tanba rai halai, entaun ita sei husu ba empreza ne’ebé halo projetu atu hadi’a tanba nia tempu retensaun sei iha tinan ida,” Arsénio Paixào Bano, ko’alia iha Kutete, kinta ne’e.
Nia informa, kuaze ema barak krítika dehan projetu laiha kualidade, maibé haree udan mós la para, estrada mós balu reabilita kondisaun maibé ida-ne’ebé halo foun, sei hetan estragu tanba foin mak ezekuta iha tinan kotuk.
“Ita haree bairru Kutete mós fatin ida tuan no bee-moos nalihun iha fatin-fatin, kuandu udan bee sirkula maka’as liután, entaun estraga estrada sira, ha’u hanoin ita sei rezolve ho empreza tanba ne’ebá ne’e la’ós estrada ho distánsia naruk maibé kuaze metru lima de’it maka estragu tanba rai halai,” nia afirma.
Entretantu, projetu reabilitasaun estrada rurál ne’e ezekuta hosi empreza lokál Lifau Indah Unip,Lda, ho valór kontratu hamutuk $2,623,959.80 prevee hosi Orsamentu Jerál Estadu (OJE) 2022 nian.
Distánsia ba reabilitasaun estrada rurál hosi suku Bobokase liga ba bairru Kutete, aldeia Mahata, suku Costa ho distansia kilómetru 14, manutensaun estrada ne’e nia médida metru-lima, kompleta ho valeta, ponte boot ida no ponte ki’ik hamutuk 10 no moru.
Entretantu, tuir dadus bazea dokumentu cesta bázika 2021 nian, totál komunidade iha aldeia Mahata hamutuk 1,899 komposta hosi mane 908 no feto 991. Nune’e mós iha suku Bobokase hamutuk 3,105 komposta hosi mane 1,592 no feto1,513 komposta hosi aldeia Fatubijae no aldeia Bihala.
Jornalista: Abílio Elo Nini
Editor: Evaristo Soares Martins
