iklan

NASIONÁL, EDUKASAUN, DILI, HEADLINE

MEJD presiza ko’alia ho komunidade okupa fasilidade eskola

MEJD presiza ko’alia ho komunidade okupa fasilidade eskola

Diretór Servisu Edukasaun Munisípiu Dili, Carlito Soares. Imajen Tatoli/Tomé Amado.

DILI, 19 janeiru 2023 (TATOLI)–Ministériu Edukasaun Juventude no Desportu (MEJD) deside ona molok mandatu VIII Governu ramata, sira-nia parte sei ko’alia ho okupante ka komunidade uma kain 73 ne’ebé okupa área eskola atu bele hamamuk ona fasilidade eskola ne’ebé sira okupa.

Notísia Relevante: Komunidade okupa área eskola, pre-eskolár lima iha Dili labele konstrui

Ministru Edukasaun Juventude no Desportu (MEJD), Armindo Maia, informa okupante sira-ne’ebé okupa fasilidade eskola sira-ne’e mesak komunidade no ema timoroan de’it, no bainhira atu hasai sira presiza ko’alia ba malu atu nune’e bele hetan solusaun ida di’ak iha futuru.

“Ita buka dalan ona atu rezolve neineik, tanba sira-ne’e ita-nia komunidade. Ita labele ba duni de’it sira maibé ita presiza ko’alia ho sira,” Ministru Armindo hateten ba jornalista sira iha iha Palásiu Gvernu, kuarta ne’e.

Ministériu Edukasaun Juventude no Desportu (MEJD) ne’e konsidera katak asuntu ida-ne’e la’ó MEJD nia responsabilidade maibé Ministériu Edukasaun-nian de’it, maibé presiza mós envolve liña Ministeriál sira seluk.

Tanba, nia dehan, ema sira hela iha área eskola ne’e la’ós lori fatuk no ai, nune’e tenke hatuur asuntu ne’e ho didi’ak atu bele rezulta solusaun ida di’ak liu.

“Ha’u konsidera katak ministériu ne’ebé iha kompeténsia atu bele tuur hodi ko’alia asuntu ne’e hamutuk mak Ministériu Edukasaun, Ministériu Administrasaun Estatál, Ministériu Justisa, no Diresaun Nasionál Teras Propriedade, tanba ministériu sira-ne’e mak relevante ho asuntu sira ne’e,” nia dehan.

Governante ne’e hateten, bainhira Governu iha intensaun hakarak atu rezolve asuntu ida-ne’ebé pertinente hanesan ne’e tenke ko’alia ho komunidade sira, ho nune’e mak sira bele sente duni katak asuntu edukasaun ne’e importante duni ba ema nia moris.

Maibé, nia dehan, bainhira laiha enkontru ida depois Governu foti desizaun ba hasai de’it okupante sira-ne’e bele kria fila-fali dezentendimentu ladi’ak ba malu iha futuru.

Diretór Servisu Edukasaun Munisípiu Dili (DSEMD), Carlito Soares, kateten nia ladún kontente tanba okupante ne’ebé hela iha área eskola ne’e, la’ós komunidade baibain de’it maibé iha mós profesór mós okupa hotu fasilidade eskola.

“Ita-nia profesór sira simu saláriu kada fulan, okupa tan fasilidade eskola nian maibé bainhira Governu iha planu atu konstroi eskola, mestre sira mak hamriik husu fali sira-nia diretu. Ida-ne’e mak sai problema ba nasaun ne’e. Loloos ne’e, VIII Governu Konstitusionál buka atu rezolve de’it ona komunidade nia problema iha eskola ne’e, la’ós ho fali profesór sira.

Maibé, nia nafatin kumpre desizaun Ministru nian katak sei buka dalan atu ko’alia ho okupante sira, tanba iha ona planu atu haree mós indemnizasaun maibé nia seidauk hatene didi’ak prosesu indemnizasaun ne’e la’o oinsá.

Notísia Relevante: Uma-Kain 15 Okupa Areadór Eskola 10 Dezembru Perturba Prosesu Aprendijazén

NoJornalista : Tomé Amado

Editór            : Cancio Ximenes

iklan
iklan

Leave a Reply

iklan
error: Content is protected !!