iklan

DILI, HEADLINE, SAÚDE

MS-EUA lansa manuál foun ba deskrisaun servisu

MS-EUA lansa manuál foun ba deskrisaun servisu

Ministra Saúde, Odete Maria Freitas Belo, entrega manuál matadalan rekursu umanu (RH, sigla portugés) ba kargu sefia sira iha Ministériu Saúde (MS), iha salaun Hotel Timor Dili, kinta (19/01). Imajen Tatoli/Francisco Sony

DILI, 19 janeiru 2023 (TATOLI) –Ministra Saúde, Odete Maria Freitas Belo, hamutuk ho Enkarregada Negósiu, Estadus Unidus Amérika (EUA), Zema Semunegus, halo lansamentu ba manuál deskrisaun servisu no manuál ba avaliasaun dezempeñu pesoál saúde ministeriál, ne’ebé sei iha impaktu transformativu atu hametin jestaun forsa traballu saúde iha Timor-Leste.

Lansamentu ne’e sai hanesan etapa importante ida ba Governu Timor-Leste atu haforsa liután sistema saúde públiku ho apoiu husi EUA liuhosi Ajénsia ba Dezenvolvimentu Internasionál (USAID).

“Manuál ne’ebé ohin lansa ne’e hetan hanoin hosi professionál saúde sira ne’ebé servisu iha sentru saúde sira, postu saúde sira hodi asegura katak investimentu ne’ebé Governu halo bele kontribui ba melloramentu kualidade presatasun saúde iha ita nia komunidade”, ministra dehan iha Hotel Timor, ohin.

Nia dehan Rekursu Umanu sai henesan xave importante iha prosesu konstrusaun sistema nasionál saúde ne’ebé forte, efisiente, efikas no sustentável.

“Ita atu halo buat di’ak ruma, ita atu avansa ba oin mak hadia uluk lai Rekursu Umanu iha ita nia uma-laran”, nia revela.

Iha manuál foun ne’e sei hametin liután profisionál saúde sira nia servisu ho di’ak.

Aleinde avalia funsionáriu sira nia dezempeñu sei liga ho ministériu nia rezultadu sira iha programa no atividade ne’ebé la’o hela, signifika katak funsionáriu ne’ebé dezempeña di’ak iha nia servisu bele sistemátiku identifikadu no hetan apresiasaun liuhosi promosaun, progresaun, no mekanizmu apresiasaun pozitivu seluk.

Iha okaziaun ne’e, Enkarregada Negósiu EUA, Zema Semunegus, hateten kontinua hametin liután parseria entre EUA no MS.

“Estadus Unidus Amérika iha kompromisu atu hametin liután parseria ho Timor-Leste no haforsa mós saúde sidadaun Timor-Leste nian”, encarregada hateten.

EUA orgullu bele ajuda ona MS dezenvolve dokumentu rua ne’e liuhosi USAID nia atividade ba sustentabilidade sistema saúde.

“USAID servisu hamutuk ho Diresaun Nasionál Rekursus Umanus no Diresaun Jerál Servisu Korporativa iha Ministériu Saúde iha 2022 atu dezenvolve no finaliza dokumentu rua ne’e liuhosi diskusaun lubun ida ho parte interesadu sira, inklui ho profisionál saúde oioin.

Dezde Timor-Leste nia independénsia, USAID kontribui ona millaun $323-resin atu apoiu dezenvolvimentu ida ne’ebé inkluzivu no hakmatek.

Jornalista: Hortencio Sanchez

Editór : Zezito Silva

iklan
iklan

Leave a Reply

iklan
error: Content is protected !!