iklan

DESPORTU, DILI, HEADLINE

Jogadór SLB Laulara 85% hosi selesaun nasionál prontu partisipa liga

Jogadór SLB Laulara 85% hosi selesaun nasionál prontu partisipa liga

Jogadór SLB Laulara prontu no preparadu atu kompete iha liga époka 2022-2023. Imajen/Espesiál.

DILI, 21 janeiru 2023 (TATOLI)–Sekretariu Jerál klube primeira divizaun AD SLB Laulara ho naran istimadu Makikit Laulara, Domingos dos Santos Caero, hateten daudaun ne’e prontu no preparadu atu kompete iha liga époka 2022-2023 no garante sei hatudu jogu ne’ebé brillante, tanba jogadór kuaze 85% mai hosi selesaun nasionál.

“Ami preparadu hela, maske liga laiha mós ami sempre preparadu tanba ami-nia jogadór kuaze 85% joga iha selesaun nasionál senior no junior. Ida-ne’e mak jogadór sira preparadu no ida-ne’e fasil ba treinadór atu monta de’it kompozisaun hodi hetan line up ida-ne’ebé di’ak entre sira. Ami mós orienta ona treinadór atu bolu jogadór sira, nune’e bele halao ona treinamentu,” Domingos hateten ba Agência Tatoli iha Taibessi, Dili, sábadu ne’e.

Jogadór anteriór mak sei mantein no iha jogadór balun mak sai ba klube seluk hanesan, Mouzinho de Lima ne’ebé daudaun ne’e joga hela iha liga Kamboja ho klube Visakha FC no João Pedro mak ba iha klube seluk, ho nune’e jerente klube deside bolu fali jogadór estranjeiru hosi Ghana ho naran Vakayoka atu ajuda iha lina defeza.

“Klube balun ba halo ona rejistrasaun maibé ami loron ikus mak ba halo rejistrasaun mós di’ak hela. Ami sei hein hela informasaun serteza kona-ba realizasaun liga ne’e tanba ami klube seidauk hetan informasaun hosi rezultadu enkontru entre Sekretariu Estadu Juventude no Desportu (SEJD), Federasaun Nasionál Timor-Leste (FFTL) no LFTL. Maibé iha tempu besik sira sei fó informasaun karik ami hein de’it tanba rejistu ne’e loron besik mak ami ba rejistu,” nia hateten.

Lideransa SLB ne’e hateten, klube ne’e durante liga hahú iha tinan 2015-2022 sempre koopera hodi partisipa tanba ho liga mak bele hasa’e liután talentu no kapasidade jogadór nian, nune’e reprezenta Timor-Leste hanesan selesaun ba joga iha rai-li’ur fó rezultadu pozitivu.

AD SLB Laulara hanesan klube ida-ne’ebé funda hosi lider Karismatiku Kay Rala Xanana Gusmão ne’ebé partisipa iha liga époka dahuluk iha tinan 2015 sai kedan kampiaun ba liga hodi marka istoria ba Timor-Leste hanesan klube primeiru sai kampiaun ba liga refere.

Jornalista : Hortencio Sanchez 

Editór       : Cancio Ximenes

iklan
iklan

Leave a Reply

iklan
error: Content is protected !!