iklan

DESPORTU, DILI, HEADLINE

FBATL hakarak hasae prestasaun rekursu umanu

FBATL hakarak hasae prestasaun rekursu umanu

Kategoria Boxista feto Layang Juniór 49 kilograma, Joaninha uza uniforme mean kontra Brigita do Camo, uza uniforme azul, iha kompetisaun aniversáriu El-Matadór ba dala-2. Iha kampu SEJD, kinta (21/10). Imajen Tatoli/Francisco Sony

DILI, 24 janeiru 2023 (TATOLI) – Sekretáriu Jerál Federasaun Boxe Amadora Timor-Leste (FBATL) Rogerio Amaral Soares, hateten planu no programa prioritáriu ne’ebé define melloramentu rekursu umanu liuhosi hasae prestasaun boxista sira hodi reprezenta Timor-Leste ba jogu internasionál.

“Ami nia planu prioridade mak presiza halo formasaun ba árbitrajen no treinadór atu bele aumenta tan númeru treinadór no árbitrajen nian, tanba ho númeru ne’ebé minimu fó impaktu ba oinsa dirije jogu no treinamentu ba atleta sira, ida ne’e mak ami sei lori treinadór internasionál mai fó treinamentu ba ita nia rekursu sira ne’e”, Rogerio dehan ba Agência TATOLI iha Benfica Colmera, ohin.

Nia revela presiza duni prodúz treinadór barak, nune’e bele fó formasaun ho di’ak ba boxista sira iha klube ida-idak, nune’e bele hetan fini ka atleta ne’ebé di’ak tanba daudaun ne’e treinadór no árbitru hamutuk 35, iha árbitru na’in-15 no treinadór na’in-20.

“Númeru ne’ebé ita iha seidauk másimu ho nune’e mak ita presiza atu aumenta tan”, refere nia.

Tuir nia formasaun sei halao iha tempu besik no FBATL sei submete proposta ba Sekretáriu Estadu Juventude no Desportu (SEJD) atu apoiu orsamentu hodi realiza atividade ho tipu formasaun iha rua, konvida treinadór internasionál liuhosi Asosiasaun Internasionál Boxe (AIB-sigla English) ba kategoria internasionál no formasaun sei fó hosi ekipa tékniku FBATL nian ne’ebé ho kategoria nasionál.

“Atu hala’o atividade sira ne’e ami sei hala’o proposta ida ba Governu liuliu SEJD atu apoiu orsamentu, orsamentu nia totál ami sei tetu hela bainhira los ona mak ami fó sai ba ita bo’ot sira”, revela nia.

Nia hatutan atleta atu iha prestasaun ne’ebé di’ak presiza treinadór ne’ebé iha koñesimentu luan no abilidade di’ak hodi fó treinamentu.

Aleinde ne’e, FBATL sei realiza mós worskhop ba lideransa no jestaun ba treinadór no ekipa federasaun nian hotu atu bele haklean kapasidade hodi hala’o servisu ho másimu.

“Ita mós sei bolu parte Organizasaun Naun Governamentál (ONG) balu iha esperiénsia di’ak ba lideransa no jestaun atu fó mós workshop ba ita nia treinadór sira tanba atu kaer atleta mós tenke iha lideransa ne’ebé di’ak, tenke iha jestaun ne’ebé di’ak atu jere atividade hotu, ba estrutura federasaun mós importante liuliu iha parte administrasaun nian”, hateten nia.

Iha 2023 sira sei la’o uluk ho atividade hirak ne’e no tinan oin mai sei lao fali ho atividade ne’ebé la hanesan atu bele dezenvolve Boxe iha Timor-Leste ho di’ak liu ba oin.

Jornalista: Hortencio Sanchez

Editór : Zezito Silva

iklan
iklan

Leave a Reply

iklan
error: Content is protected !!