iklan

BAUCAU, HEADLINE, MUNISÍPIU, SAÚDE

Saúde Baucau prioritiza prevensaun moras haat iha 2023

Saúde Baucau prioritiza prevensaun moras haat iha 2023

Diretór Servisu Munisipál Saúde Baucau, Domingos Reinaldo da Costa Guterres. Imajen Tatoli/Natalino Belo.

BAUCAU, 24 janeiru 2023 (TATOLI) – Servisu Munisipál Saúde Baucau fó prioridade ba prevensaun moras haat hodi redús taxa mortalidade iha tinan 2023.

Diretór Servisu Munisipál Saúde Baucau, Domingos Reinaldo da Costa Guterres, esplika, prevensaun ba moras hirak-ne’e kompostu hosi kampaña vasinasaun integradu, Infesaun Respiratóriu Aguda (ISPA), Tuberkuloze (TBC) no dengeu.

“Ita nafatin fó prioridade ba moras hirak-ne’e atu prevene tanba hakarak redús taxa mortalidade no morbilidade, ne’e importante ba kna’ar saúde,” Diretór Servisu Munisipál Saúde Baucau hateten iha Vila Antiga, tersa ne’e.

Servisu Munisipál Saúde Baucau konsidera moras haat ne’e kontribui ba taxa mortalidade no morbilidade iha munisípiu Baucau kada tinan.

Nune’e, prevensaun moras ba labarik sira liuhosi kampaña vasinasaun integradu hodi prevene moras hanesan pneumonia, fahé vitamina A, albendazol prevene lumbringa no sarampu.

Dengue ne’ebé kada tinan sempre afeta komunidade nune’e kontinua prevene hanesan hamoos ambiente, toba uza muskiteiru, fahe abate no sosializa hodi hasa’e koñesimentu kona-ba prevensaun moras refere ne’ebé afeta ba labarik no idade avansadu sira.

Ba joven sira halo prevensaun ba moras torberkuloze ne’ebé parte saúde Baucau hahú halo peskiza ho rekolla dadus no sosializa kona-ba moras refere liuhosi meiu promosaun redús fuma no konsumu alkól.

Nune’e mós prevensaun moras ba idade idozu sira hanesan ISPA ne’ebé afeita hosi rai-rahun, te’in hahan uza ai-sunu nune’e halo iis boot tanba mai hosi respiratóriu.

“Atu redús totalmente ne’e difisil maibé ho esforsu prevensaun neineik bele redús moras hirak- ne’e,” Domingos Guterres akresenta.

Servisu Saúde Baucau kontinua sosializa kona-ba moras hotu bazea ba dadus iha fatin sira nune’e bele hasa’e koñesimentu no halo prevensaun antes komunidade sira afeta moras.

Jornalista    : Natalino Belo 

Editór           : Evaristo Soares Martins 

iklan
iklan

Leave a Reply

iklan
error: Content is protected !!