iklan

EDUKASAUN, BOBONARO, HEADLINE, MUNISÍPIU

SKA-KU Maliana rejista estudante foun 232 ba tinan letivu 2023

SKA-KU Maliana rejista estudante foun 232 ba tinan letivu 2023

Koordenadór Sentru Komunitária Aprendizajen-Kuda Ulun (SKA-KU), postu administrativu Maliana, munisípiu Bobonaro, Victor Martins. Imajen Tatoli/Sérgio da Cruz.

BOBONARO, 24 janeiru 2023 (TATOLI) — Sentru Komunitária Aprendizajen (SKA)-Kuda Ulun (KU) postu administrativu Maliana, munisípiu Bobonaro rejista estudante foun hamutuk na’in 232 ba tinan letivu 2023.

Notísia relevante: SKA-KU Maliana hahú fó formasaun ba estudante na’in-97

“Ita iha kursu komputadór na’in-24, Korea na’in-120 no língua inglés na’in-88,” Koordenadór SKA-KU Maliana, Victor Martins informa ba Jornalista sira, iha Holsa, tersa ne’e.

Nia akresenta, hosi kursu programa tolu ne’e iha programa rua mak estudante sira-ne’ebé partisipa iha formasaun bázika ne’e balu remata ona ensinu sekundariu, balu estudante ensinu báziku filiál (EBF), Holsa no ensinu Báziku Sentrál (EBC, sigla portugés) númeru I Maliana no  eskola sekundariu Jerál (ESG) númeru I Don Martinho da Costa Lopez Maliana (DMCL) no eskola públiku sira iha kapitál Maliana.

Enkuantu ba kursu língua Koreia oportunidade loke ba estudante ne’ebé remata ona eskola iha nível sekundária.

Koordenadór ne’e fundamenta, SKA-KU Maliana mós planu iha tinan ne’e sei loke tan kursu ba programa alfaiate.

“Ami agora daudaun ne’e sei iha hela faze ka prosesu rekruta formadór atu fasilita formasaun ba estudante sira oinsá aprende suku roupa no seluk tán, tanba programa ida-ne’e la’ós kualkér ema bele hanorin,” nia hateten.

Nia hatutan, objetivu hosi estabelesimentu sentru komunitária ne’e atu fó formasaun no kapasitasaun ba komunidade ne’ebé konsideradu analfabetu hodi hakbiit sira-nia koñesimentu, nune’e bele prepara rekursu uma hodi  kompete iha merkadu traballu iha nível lokál no mós rai-li’ur.

“Ita-nia joven sira laiha koñesimentu iha área língua nian, ne’e difikulta tebes sira atu kompete iha merkadu traballu, entaun sentru ne’e iha hanoin ida hakarak fó kontribuisaun ba nasaun, liuhosi kursu lian inglés, koreia no komputadór hanesan meiu ida reduz dezempregu iha ita-nia munisípiu Bobonaro,” Koordenadór ne’e fundamenta

Formandu Longuinhos Correia, sente kontente no agradese bele hetan oportunidade partisipasaun formasaun língua koreia iha sentru refere ne’ebé oferese kursu hosi formadór timor-oan sira.

“Ha’u mai kursu iha-ne’e atu prepara ha’u-nia futuru ba aban bainrua nian, maske aban bainrua karik la konsege bá koreia, maibé iha netik esperiénsia oituan, ema seluk bele presiza fatin ne’ebé ita bele ba kompete,” joven ne’e akresenta.

Durante ezisténsia SKA-KU Maliana prodús ona formandu na’in 2020 to’o agora hamutuk na’in 50-resin ba programa ekivalénsia nivél (2). Hosi númeru ne’e iha labarik na’in-15 ne’ebé la kontinua estudu iha nível pre-sekundáriu mak konsege hetan oportunidade kontinua ona estudu iha nível sekundária.

Sentru ne’e harii hosi UNESCO iha Timor-Leste ho orsamentu $20.000.00, ne’ebé serbisu hamutuk ho Ministériu Edukasaun, Juventude no Desportu (MEJD) ne’ebé inaugura ofisialmente hosi Ministru Ensinu Superiór, Siénsia no Kultura (MSSK), Longuinhos dos Santos, iha fulan-fevereiru tinan 2022 liubá.

Jornalista   : Sérgio da Cruz

Editór          : Evaristo Soares Martins

iklan
iklan

Leave a Reply

iklan
error: Content is protected !!