Estrela+ subliña estratejia tolu hodi halo advokasia ba ema afetadu moras HIV/SIDA
DILI, 25 janeiru 2023 (TATOLI) – Diretora Ezekutiva Esterla + iha Timor-Leste Ines Lopes, hateten Estrela+ iha estratejia tolu hodi halo advokasia ba ema ne’ebé afetadu ba moras HIV/SIDA iha Timor-Leste.
“Ami iha estratejia tolu hodi halo advokasia ba ema sira ne’ebé mak afetadu ba moras HIV/SIDA, mak oinsá sira komprende sira nia situasaun ida ne’ebé iha pozitivu nia-laran, oinsá atu halo tratamentu no haree mós ba sira nia direitu”, Diretora Ezekutiva Esterla + iha Timor-Leste Ines Lopes, dehan ba TATOLI iha edifisiu Farol, ohin.
Advokasia tuir mai mak Estrela+ haree liubá lei no halo estigmasaun no diskriminasaun ba ema afetadu sira, koailia ba direitu umanu ema nian, entaun ida ne’e Estrela+ haree hotu ba situasaun sira ne’e. nune’e mós pontu advokasia ikus envolvimentu entidade nian liuliu igreja, tanba Timor-Leste maioria katólika, oinsa igreja bele ajuda fahe informasaun atu ema hotu iha konsiénsia atu bele redúz stigma ba malu no suporta ema sira ne’e ba halo tratamentu.
Nune’e Estrela+ mós tuir formasaun balun, kona-ba atu partilla liután informasaun bázika hodi ajuda MS hasa’e konsiénsia ema nian, oinsá halo prevensaun ba moras HIV/SIDA iha Timor-Leste.
“Estrela+ nia vizaun atu haree ba ema ne’ebé afetadu HIV/SIDA, tenke livre no moris saudável, labele iha diskriminasaun no estigmasaun banhira atu atinje misaun ne’e, ami nafatin promove edukasaun no mós halo parseiru ho entidade sira atu haforsa vizaun ne’ebé mak ami preszia”, esplika nia.
Tanba ne’e, Estrela+ kria estratejia ida hodi konsulta ho MS, katak ema ne’ebé afeta moras HIV SIDA tenke livre husi diskriminasaun no estigamasaun no tenke moris saudável, tanba Estrela+ nia prinsípiu mak tenke respeita no konfidensialidade ema nian privasidade, entaun ida ne’e mak durante ne’e halo.
Estrela+ nia parseiru besik liu mak MS, tanba moras HIV/SIDA moras ida ne’ebé mak perigu, entaun atu hatete organizasaun estrela + harii iha 2012 no hetan legalizasaun iha 2013 no hetan tulun husi MS liuhosi Globál Fund ba programa Tuberkoloze, HIV/SIDA no Malaria, entaun Estrela+ hanesan implementadór ba projetu HIV/SIDA durante ne’e liuliu iha advokasia nian.
“Ami iha parseiru lubuk, aleinde ne’e ami mós sai membru ba NGO forúm ne’ebé foka liu ba saúde nian, nune’e ba mós membru ba Rede Feto Timor-Leste no sai mós organisazaun ba membru rejionál, Caritas Dili, OMS, UNFPA no parseiru sira seluk ne’ebé foka ba HIV/SIDA”, akresenta nia.
NGO Estrela+ iha rekursu umanu natoon atu halao servisu advokasia ba moras HIV/SIDA ida ne’e iha terenu, tanba suporta másimu husi MS liuliu Global Fund tanba vokál point ne’ebé mak destaka iha área afetadu sira mak hanesan Dili, Bobonaro, Covalima, Baucau, no RAEOA atu nune’e mosu estigamsaun ruma ekipa sira atende kedas hodi fó advokasia ba sira.
Jornalista : Felicidade Ximenes
Editór : Zezito Silva
