AFTL sei realiza Liga Futsál iha abríl

DILI, 26 janeiru 2023 (TATOLI) – Sekretáriu Jerál Asosiasaun Futsál Timor-Leste (AFTL) Fernando Baptista, informa Liga Futsál sei hala’o iha abríl.
“Foin lalais ami enkontru ho klube sira haree kondisaun kampu ne’ebé ho nível iha Dili laran mak de’it FALINTIL Forsa Defeza Timor-Leste (F-FDTL) Fatuhada nian maibé ita tenke gasta osan barak ba manutensaun ho osan rihun $10-resin nusa osan ne’e buka fatin atu halo konstrusaun de’it kampu ida, ne’e mak ami halo proposta ba Sekretariu Estadu Juventude no Desportu (SEJD) fó ona fatin, ami halo de’it konstrusaun sei remata iha marsu foin bele hala’o liga”, Fernando dehan ba Agência TATOLI iha edifisiu AFTL, Bairo Formosa, kinta ne’e.
Nia dehan dezeñu ba kampu konklui ona no SEJD halo oan aprovasaun ba proposta AFTL nian no semana ne’e nia-laran sei halo ona reabilitasaun ba kampu futsál iha resintu SEJD, nune’e iha abríl liga bele lao ona.
“Ita sei halo de’it reabilitasaun ba kampu iha Lecidere ne’e, ita muda halo sai nível internasionál, aumenta tan naruk ho luan, prosesu halo ne’e ba uluk kampu isin lolon, prontu ona ita bele hahú jogu ona, depois tinan oin fali mak ita halo fali tribun sira, tinan oin tan halo tan leten atu satan udan ben maibé agora tanba kestaun orsamentu ita halo neneik, importante ida ne’e sai hanesan kampu própriu ba ami”, revela nia.
Orsamentu ne’ebé halo reabilitasaun ne’e apoiu hosi Federasaun Futeból Timor-Leste (FFTL) no AFTL nian rasik, totál orsamentu atu halo reabilitasaun ba kampu ne’e hamutuk rihun $10-resin.
Tuir nível internasionál ba kampu futsal, nia naruk metru 38 no nia luan metru 20, kampu AFTL nian ho medida internasionál ba realizasaun liga.
Nia hatutan antes atu foti desizaun, AFTL realiza ona reuniaun ho klube hotu ne’ebé hamahan aan iha AFTL nia okos no konkorda reabilita uluk kampu tanba ne’e adia liga ba abríl.
Rekorda fali katak klube hirak ne’ebé sai hanesan membru iha AFTL hamutuk 24 kompostu hosi primeira divizaun 10 no segunda divizaun 14, primeira divizaun mak hanesan, Ramelau FC, Mushila FC, Boa Sorte FC, Becusse United, Mau Putar FC, São Fransisco Xavier, Caesardante FC, AD. Samoro, Gamer FC no Jerman FC.
Enkuantu segunda divizaun mak hanesan, Coelho FC, Bermeta FC, Maudoko FC, Santa Cruz, VDL Lahane FC, Boavista FC Timor, Kuda Ulun FC, Crazy Hourse, FIEL FC, Estrela Baguia, Baucau all Star, B’TAL FC, Kablaki FC no Academica FC.
Jornalista: Hortencio Sanchez
Editór : Zezito Silva

