Autoridade RAEOA oferese solár-sel ba komunidade Buki-Teina’e
OÉ-CUSSE, 27 janeiru 2023 (TATOLI) –Fatin izoladu daruak bairru Buki, aldeia Teina’e, suku Naimeko, sub-rejiaun Pante Makasar, sesta ne’e simu ona apoiu solar-sél hosi Autoridade Rejiaun Administrativa Espesiál Oé-Cusse Ambeno (RAEOA) lidera direitamente hosi Arsénio Paixão Bano.
Fatin izoladu ne’e koñesida fatin izoladu daruak iha RAEOA primeiru maka bairru Bi-Eli ne’ebé lokaliza iha aldeia Manan, suku Bene-Ufe, sub-rejiaun Nítibe.
Nune’e abitante sira iha bairru izoladu ne’e, José Agustinho da Costa Salu, sente orgullu tanba ho apoiu ne’e bele tulun ona komunidade sira atu hetan naroman ne’ebé sira hein tinan barak ona.
“Ami sente orgullu tanba primeiru-véz, hosi Autoridade mai tulun ona ami iha fatin izoladu ne’e, tanba ami hela iha ne’e dezde tempu portugés to’o okupasaun ami hela iha nakukun, maibé ohin ba oin ami sei hetan naroman ona,” nia orgullu.
Abitante Filomena Nau, dehan nune’e “Ami prepara dezde horsehik, tanba ohin loron ema boot hosi Autoridade mai vizita haree direita ami iha fatin ne’e, ami senti kontenti, tanba desde ita ukun an, nunka ema boot ida mai haree ami, atu tau matan ba ami, ne’eb’e ohin ami agradese tanba dahuluk, autoridade RAEOA mai vizita ami no lori mós apoiu fó naroman ba ami liuhosi solár-sel.”
Xefe aldeia Teina’e, Jacob Baptista Kolo, informa, bairruo izoladu Buki iha uma-kain 23, ohin uma-kain 10 simu ona hela 13.
“Hanesan Autoridade lokál sente kontenti hamutuk ho komunidade sira, tanba ohin primeira-véz Autoridade RAEOA mai fahe ona solár-sel, no vizita mós ami iha fatin izoladu ne’e, ne’ebé ami agradese no sente kontente,” nia orgullu.
Iha biban ne’e, Prezidente Autoridade RAEOA, Arsénio Paixão Bano, informa, planu prioridade ba tinan 2023, Autoridade RAEOA rezolve eletrsidade 100% ba komunidade sira-ne’ebé hela fatin izoladu kobre hotu sub-rejiaun haat, Oésilo, Pássabe Nítibe no Pante Makasar.
“Ohin ami mai haree direitamente fatin izoladu daruak iha Oé-Cusse depois Bi-Eli, tanba ita la’o-ain hosi estrada tama mai kuaze kilómetru hitu maka foin to’o, maibé molok to’o fatin ne’e ami sei liuhosi aldeia Oetfo hodi observa fatin izoladu sira atu garante eletrisidade 100% iha suku Naimeko,” Arsénio Paixão Bano, informa ba Agência Tatoli iha aldeia Teina’e, suku Naimeko
Nune’e iha faze primeiru uma-kain 10 maka hetan, maibé uma-kain 13 tékniku sira foin identifika, entaun Autoridade tau ona iha planu faze tuir mai iha fevereiru oin mai atu rezolve hotu tanba iha Oetfo uma-kain 38 seidauk hetan, tanba hela dook hosi rede distribuisaun.
“Ohin ita husu ona xefe suku no aldeia sira hatama dadus, tanba Oé-Cusse hakarak komunidade asesu hotu liña elétrika 100%, tinan ida-ne’e ita-nia tarjetu ba uma-kain 216 maibé sei iha aumenta, entaun ita kompromete atu kontinua programa ne’e to’o kobre hotu área izoladu sira iha sub-rejiaun haat,” nia promete.
Entretantu, tuir dadús ne’eb’e Agência Tatoli liuhosi Departementu Eletrisidade de Timor-Leste (EDTL) iha RAEOA, totál benefisiáriu ba solár-sel hamutuk uma-kain 216, ho totál fundu ba projetu ba instalasaun ne’e hamutuk $155,999.52 ezekuta hosi empreza Vitarly Unipesoál, Lda, no orsamentu ne’e Autoridade RAEOA aloka hosi Orsamentu Jerál Estadu (OJE) 2022 nian.
Notísia relevante: RAEOA hahú instala solár-sel ba uma-kain 216
Jornalista: Abílio Elo Nini
Editor: Evaristo Soares Martins
