DILI, 27 janeiru 2023 (TATOLI)–Dirijente Eskola Ensinu Sekundáriu Jerál (ESG) 5 de Maio Becora foin mak submete lista estudante na’in-ualu (8) ne’ebé tama iha klasifikasaun mellór klasifikadu ba Servisu Edukasaun Munisípiu Dili (SEMD) atu halo verifikasaun.
Notísia Relevante: Komisaun G simu lamentasaun kona-ba bolsa méritu hosi diretór edukasaun
“Ami iha estudante mellór klasifikadu hamutuk na’in-ualu (8) mak sira-nia lista ami haruka hotu ona ba Edukasaun Munisípiu Dili. Hosi estudante na’in-ualu ne’e na’in tolu (3) ninia dokumentu hanesan konta bankária kompletu hotu ona falta na’in-lima (5) mak seidauk,” Diretór Eskola ESG 5 de Maio Becora, Adelino Nicolau Ornai, hateten ba Agência Tatoli iha Becora, sesta ne’e.
Nia dehan, estudante na’in-ualu (8) ne’ebé tama mellór klasifikadu ne’e, na’in-lima (5) hosi désimu primeiru anu ba désimu segundu anu, no na’in-tolu (3) ne’e estudante finalista iha tinan kotuk maibé.
Nune’e m’os, estudante na’in-lima (5) hosi désimu primeiru ano ba désimu segundu ano ne’e, na’in-tolu (3) hosi departamentu Siénsia Naturál (CN) no na’in-rua hosi Siénsia Sosiál Humaniora (CSH).
Estudante na’in-lima (6) ne’ebé ultrapasa ona klase ba désimu segundu ano ne’e mós iha na’in-tolu (3) hosi CN mak kompleta ona sira-nia dokumentu hanesan konta bankária hela de’it, estudante na’in-rua (2) hosi CSH mak sei trata hela sira-nia dokumentu sira maibé sira tenke trata ho seriedade tanba dirasaun servisu edukasaun Dili orienta ona tenke lalais.
Estudante finalista na’in-tolu seluk mós sira ninia lista eskola hatama hotu ba edukasaun Munisípiu Dili atu prosesa, maibé direitu ba estudante na’in-tolu (3) nian atu hetan bolsa méritu ne’e kompeténsia ministériu nian no obrigasaun eskola nian atu submete de’it sira-nia lista.
“Ida-ne’e obrigasaun ita-nian atu hatama de’it agora sira atu hetan ka lae ne’e depende ba desizaun Ministériu nian,” nia dehan.
Diretór Servisu Edukasaun Munisípiu Dili (DSEMD), Carlito Soares, kontinua husu ba eskola sira iha Dili ne’ebé seidauk submete lista estudante mellór klasifikadu sira-nian inklui ho dokumentu konta bankária sira atu lalais submete ona, atu DSEMD bele prosesu ho lalais hodi hein desizaun ikus Ministériu nian atu halo transferénsia osan ba konta bankária estudante ida-idak nian.
Maibé, nia hateten, prosesu ba lista estudante mellor klasifikadu sira-ne’e mak to’o agora seidauk iha desizaun finál tanba to’o agora Ministériu Edukasaun sei kontinua halo hela prosesu verifikasaun tanba iha dadus no valór estudante sira-nian mak ninia kolokasaun la tuir klasifikasaun.
Jornalista : Tomé Amado
Editór : Cancio Ximenes
