SEJD tau mós prioridade ba jinástika iha eskola hotu 

DILI, 27 janeiru 2023 (TATOLI) – Sekretáriu Estadu Juventude no Desportu (SEJD) Abrão Saldanha, tau mós prioridade ba atividade jinástika ne’ebé antes ne’e la’o hela maibé ladún másimu liuliu iha eskola sira iha teritóriu nasionál.

“Atividade jinástika ne’e ita la’o nafatin, saida mak ita la’o hela agora ne’e mak hakarak dezenvolve makas iha jinástika atu lori ba munisípiu sira, maibé daudaun ne’e munisípiu balun la’o di’ak tebes hanesan Manufahi no munisípiu balu tan”, Abrão hateten ba Agência TATOLI iha edifísiu SEJD Lecidere, ohin.

Ho nune’e SEJD kontatu ona péritu ida hosi Kuba ne’ebé espesialidade hosi jinástika atu dezenvolve hela movimentu ida ne’ebé sai identidade jinástika Timor-Leste nian.

“Bainhira péritu ne’e mai ita haruka sira atu dezenvolve hela movimentu ida jinástika ita nian ida, tanba dalabarak liu iha Timor-Leste halo jinástiku uza poco-poco maibé ita hanoin halo mós ho ita Timor-Leste nian rasik. Ita iha ona jinástika orijinál ne’e faze primeiru maibé ita hakarak halo tan faze segundu nian”, dehan nia.

Nia hatutan bainhira jinástika faze segundu ne’e iha ona SEJD sei halo sosializasaun ba públiku hotu atu bele hatene kona-ba ne’e, ita rekoñese durante ne’e sosializasaun ladún efetivu maibé ba oin ita tenke halo sosializasaun ne’e másimu atu ema hotu hatene no prátika jinástika iha dader no loraik tanba ne’e di’ak ba saúde liuliu iha eskola no isntituisaun servisu hotu.

“Ami avalia ona hodi halo sosializasaun ba públiku ne’e mak seidauk másimu mak daudaun ne’e ema ladún halo ona jinástika ne’e, maibé iha munisípiu sira jinástika iha eskola sira la’o hela”, esplika nia.

SEJD planu ona jinástika atu tau ba eskola sira hanesan programa estra-kurikulár no seluk tan tanba jinástika hanesan atividade desportiva ida ne’ebé liga ho saúde ema nian ho nune’e Governu tau prioridade atu nune’e bele hadook aan hosi moras oi-oin.

Jornalista: Hortencio Sanchez

Editór : Zezito Silva