DILI, 30 janeiru 2023 (TATOLI) – Komisaun Reguladora Arte Marsiál (KRAM) realiza sosializasaun ba Grupu Arte Marsiál (GAM) no federasaun desportiva hamutuk 18, hafoin bele atribui fundu finanseiru hamutuk millaun $2,5.
“Ohin ita halibur GAM hotu atu sosializa fundu apoiu dezenvolvimentu ba GAM hotu ho totál millaun $2,5, fundu ida ne’e ita sei fahe ba komponente lima hodi apoiu ba GAM hamutuk 18”, Prezidente KRAM Fernando da Costa, dehan iha edifísiu SEJD Lecidere, ohin.
Nia esplika, komponente lima ne’e hanesan apoiu ba administrasaun organizasaun nian, resensiamentu ba membru, formasaun ba treinadór, kompetisaun internál kada organizasaun no harii sede ba GAM ida-idak.
“Iha tempu besik sei halo distribuisaun osan ba GAM sira, ita sei fó montante tuir membru sira ne’ebé barak, se balu organizasaun kiik liu, ita sei fó tuir organizasaun ne’ebé kiik, seidauk fó sai loloos maibé tuir ami-nia desizaun atu fó boot liu ba organizasaun hirak ne’e deside rihun $300 no kiik liu rihun $6-resin, maibé ne’e ami sei haree no fó sai iha tempu tuir mai”, dehan nia.
Iha fatin hanesan, Prezidente organizasaun Persaudaraan Setia Hati Terate (PSHT), Baltazar Lemos Seixas, agradese ba Governu ne’ebé bele apoiu orsamentu ba organizasaun arte marsiál sira hotu.
“Ita agradese ba Governu tanba bele apoiu orsamentu mai ami organizasaun sira, ba ami PSHT osan atu kiik ka boot ami simu no sei ezekuta tuir saida mak Governu haruka”, dehan Baltazar.
PSHT sei trasa hela planu maibé seidauk bele fó sai ba públiku. PSHT mós hein hela orsamentu no fundu ne’e sei ezekuta regra ne’ebé Governu fó sai ona.
Iha oportunidade ne’e, Prezidente IKS-PTL Silvestre Sufa, relata orsamentu ne’ebé mak Governu apoiu, IKS sei simu no ezekuta tuir orientasaun Governu nian.
“Iha tempu besik mak Governu transfere osan ne’e ba ami, ami sei simu no ezekuta tuir rekezitu ne’ebé Governu fó sai, maibé buat hotu ami aseita só ida de’it mak ami sei koalia ho Governu liuliu halo sede arte marsiál nian ba ami, IKS sei la simu fundu ba konstrusaun see, maibé ami prepara rai, prepara buat hotu. Governu mak buka empreza hodi halo, atu nune’e relatóriu hotu Governu mak hatene, ami hein simu save de’it”, nia revela.
Organizasaun GAM hamutuk 18 ne ebé atu asesu ba fundu ne’e mak federasaun sira hamahan aan iha Konfederasaun Desportiva Timor-Leste (CDTL-siglaPortugés) kompostu hosi Taekwondo Wushu Boxe, Aikido, Karate-do, Kempo no seluktan, Federasaun Silat Timor-Leste (FSTL) kompostu hosi PSHT, IKS-PTL, Kmanek oan Rai Klaran (KORK), Seruling Dewata, Perisai Diri no Padjajaran.
Jornalista: Hortencio Sanchez
Editór : Zezito Silva
