DILI, 30 janeiru 2023 (TATOLI) – Prezidente organizasaun Persaudaraan Setia Hati Terate (PSHT) Baltazar Lemos Seieixas no Prezidente IKS-PTL Silvestre Sufa, la autoriza membru organizasaun atu utiliza atributu partisipa iha kampaña ba Eleisaun Parlamentár (ElPar) ne’ebé sei akontese iha tempu besik.
“Organizasaun PSHT la tama iha polítika, membru sira sei labele utiliza atributu atu partisipa iha kampaña, organizasaun mós sei la harii partidu, se mak ba tama iha partidu polítiku ne’e ba individuál maibé labele lori organizasaun nia naran”, Prezidente PSHT dehan ba Agência TATOLI iha edifísiu Sekretariu Estadu Juventude no Desportu (SEJD), Lecidere, ohin.
Nia dehan doutrina PSHT nian bandu organizasaun atu harii partidu maibé bainhira membru atu tama iha partidu bele maibé pesoál no labele lori organizasaun nia naran no utiliza atributu.
Iha fatin hanesan Prezidente IKS reforsa tan katak sei la tolera membru sira atu utiliza atributu partisipa iha kampaña parlamentár ne’ebé sei akontese iha tempu besik, bainhira membru ruma utiliza atributu mak sei haruka Polísia Nasionál Timor-Leste (PNTL) mak kaer.
“Eleisaun besik ona, ami nia doutrina la inklina ba organizasaun iha partidu laran, maibé hanesan sidadaun bele inklina aan iha laran maibé ne’e individu la’os lori organizasaun, iha kampaña agora mós la autoriza membru sira hatais farda ba kampaiña, se rona hatais farda ba kampaña sei haruka polísia kaer ba prosesu tuir lei”, dehan Silvestre.
Nia subliña lei No. 5/2017 bandu arte marsiál sé de’it atu la utiliza atributu organizasaun iha fatin públiku bainhira utiliza mak PNTL iha direitu kaer hodi prosesu tuir lei.
Tuir dadus hosi organizasaun rua mak IKS no PSHT halo resensiamentu ba membru sira iha teritóriu nasionál hosi IKS hamutuk rihun 25-resin no PSHT hamutuk rihun 115-resin no ida ne’e sei provizóriu.
Jornalista: Hortencio Sanchez
Editór : Zezito Silva
