DILI, 30 janeiru 2023 (TATOLI)–Diretór Servisu Edukasaun Munisípiu Liquiça (DSEML), Carlos Lopez, hateten projetu komunitária ba prosesu reabilitasaun eskola hitu (7) iha Munisípiu Liquiçá to’o agora atraza no foin atinje 40%, tanba eskola sira-ne’e la asesu ba estrada atu transporta materiál konstrusaun sira.
Notísia Relevante: Projetu komunitária 110 sei iha faze konstrusaun no reabilitasaun
“Ita iha eskola hitu (7) ne’ebé tama iha projetu komunitária mak atraza tiha tanba problema hosi udan ne’ebé boot difikulta transporte sira defisil atu tula materiál konstrusaun ba eskola sira ne’e,” Carlos Lopez hateten ba Agência Tatoli lihhosi telefónika, segunda ne’e.
Nia dehan, eskola hitu (7) ne’e kompostu hosi Edukasaun Pre-Eskolár ida (1) no Eskola Ensinu Báziku hamutuk neen (6) no eskola sira-ne’e lokaliza iha área postu adminitrativu Bazartete inklui Maubara no area balun iha Gariana nian.
Maske ho kondisaun no situasaun defisil ne’ebé eskola hitu ne’e enfrenta, maibé Ministériu Edukasaun Munisipál hamutuk ho ekipa Dirasaun Nasionál Dezenvolvimentu Parque Eskolár kontinua halo monitorizasaun, atu nune’e kuandu situasaun normaliza ona bele lalais finaliza tina prosesu reabilitasaun eskola hitu ne’e.
Tanba, nia dehan, durasaun tempu ba projetu komunitária ne’e rasik ninia data limitasaun ne’e loloos iha 07 dezembru 2022 tenke finaliza ona, maibé tanba razaun ho natureza difikulta tiha prosesu ne’e entaun prosesu reabilitasaun ne’e foin mak la’o no agora foin atinje 40%.
Entretantu, totál eskola ne’ebé tama iha Projetu Komunitária ne’e hamutuk 11 no bazea ba observasaun hosi edukasaun Munisipál nian konsege identifika iha eskola haat mak atinje ona 50%, tanba eskola haat ne’e hetan ona prosesu levantamentu ba orsamentu dala rua ona atu atinje sira-nia prosesu reabilitasaun.
Notísia Relevante: Projetu komunitária eskola 13 iha munisípiu lima sofre orsamentu 8,3%
Jornalista : Tomé Amado
Editór : Cancio Ximenes
