DILI, 31 janeiru 2023 (TATOLI)–Ministru Ensinu Superiór Siénsia no Kultura (MESSK), Longuinhos dos Santos, hateten dezeñu moru sidade universidade Aileu konklui ona no sei entrega ba Ministériu ho totalmente iha fulan-fevereiru.
Notísia Relevante: MESSK planeia empresta osan Banku Mundiál ba konstrusaun sidade universitáriu Aileu
Nia hatutan, konstrusaun moru sidade universidade Aileu ne’e rasik konklui ona no iha 25 janeiru liubá Ministériu Ensinu Superior Siénsia no Kultura hamutuk ho Ministériu Obra Públika, Ajénsia Dezenvolvimentu Nasionál (ADN) no kompañia ne’ebé kaer projetu ne’e hala’o ona reuniaun hamutuk atu entrega dezeñu moru sidade Universidade Aileu ba MESSK.
“Ita iha ona desizaun katak fulan-fevereiru ikus, tenke entrega ona totál dezeñu ne’e depois mak foin bele hahú obra kona ba moru sidade Universidade Aileu ne’e rasik,” esplika Ministru Longuinhos ba jornalista sira hafoin hasoru malu ho Primeiru-Ministru iha Palásiu Governu, tersa ne’e.
Bainhira dezeñu ne’e entrega totál ona iha fulan-fevereiru ne’e, prosesu konstrusaun moru sidade universidade Aileu ne’e bele prosesa ona liuhosi prosesu administrativu aprovizionamentu nian.
Maibé, nia esplika, bainhira enkontru entre MESSK, MOP ADN no kompañia ne’e realiza iha semana hirak liubá ne’e mós iha rekomendasaun balun ne’ebé hato’o hosi Ministériu Obra Públika no ADN hakarak halo uluk ajustamentu hamutuk iha buat balun, depois mak bele entrega totál dezeñu ne’e.
Iha prosesu konstrusaun ne’e, Ministériu prevee ona orsamentu iha fundu infraestrutura ne’ebé mak atu bele garante obra ne’e, maibé governante ne’e seidauk bele haktuir totál orsamentu hira mak prevee ona tanba sei hein hela dezeñu Planta no kadernu Enkargu (BoQ).
“Ha’u seidauk bele informa ka halo estimasaun ba orsamentu ne’ebé ita prevee ona iha fundu infraestrutura atu garante obra ba moru sidade universidade Aileu ne’e, tanba ita presiza haree uluk dezeñu,” nia hateten.
Entretantu, sorumutu ho Primeiru-Ministru (PM) Taur Mata Ruak. Nia parte relata mós asuntu rua kona-ba prosesu servisu ba implementasaun atividade iha primeiru trimestrál inklui prosesu kona-ba sidade universidade Aileu nian
Iha atividade servisu primeiru trimestrál ne’e rasik nia hato’o mós prosesu kona-ba asesu engeresu ne’ebé la’o daudaun hela kona-ba rekrutamentu ba estudante sira-ne’ebé atu tama ba Universidade Nasionál Timor Lorosa’e (UNTL) no mós Institutu Politekniku Betanu (IPB).
Notísia Relevante: MESSK sei harii morru ba Sidade Universidade Aileu tinan ne’e
Jornalista : Tomé Amado
Editór : Cancio Ximenes
