Dezeñu ba kampus nasionál IDN finaliza iha tinan ne’e

DILI, 31 janeiru 2023 (TATOLI) – Diretór Institutu Defeza Nasionál (IDN) Komodoro Donanciano Costa Gomes Pedro “Klamar Fuik”, dehan dezeñu ba kampus nasionál sei konklui iha tinan ne’e tanba prosesu la’o tinan lima ona.
“Harii kampus ne’e ami nia programa prioridade ne’ebé planea liu tinan lima ona, tanba IDN nia institutu fíziku ne’e importante atu koresponde ho prosesu hanorin no prosesu aprendizajen ba ita nia dosente ou formandu sira, ita nia alunu sira mai tuir formasaun iha IDN bele sente konfortável, ba ami hakarak kampus ida reprezenta identidade atu profisionaliza instituisaun, ne’ebé tinan ne’e ita finaliza dezeñu hakat ba konstrusaun”, Klamar Fuik hateten ba Agência TATOLI iha Palasiu Governu Dili, ohin.
Nia dehan, prosesu ba dezeñu kuaze 90% ona no iha tempu besik halo lansamentu atu prosesu konstrusaun bele realiza iha 2023 nia rohan.
“Fatin ita haree ona sei halo iha Munisípiu Aileu Suku Liurai, orsamentu ba konstrusaun ne’e kuaze millaun $60-resin, projetu ne’e bele halo pagamentu hosi Orsamentu Jerál Estadu (OJE) multi-annual ou bele mós investimentu hosi nasaun balu depois mak Governu halo pagamentu neneik”, relata nia.
Objetivu prinsipál sira harii IDN
Objetivu prinsipál hosi harii IDN ne’e atu fó formasaun ba futuru lideransa Timor-Leste nian no Institutu ne’e prezerva hodi forma lideransa liuliu iha FALINTIL-Forsa Defeza Timor-Leste (F-FDTL), Polísia Nasionál Timor-Leste (PNTL), governante no diplomata sira iha futuru.
Bainhira harii IDN la’os haree ba kuantidade kustu maibé hakarak dezenvolve ema matenek sai barak hodi lori nasaun ne’e ba oin.
IDN harii bazea ba Dekretu lei No. 12/2010 26, agostu, Institutu ida ne’e Governu harii tutela iha Ministériu Defeza nia okos hodi fó formasaun ofisiál sai ba Majór, atu ba tenente koronél tenke liuhosi kursu iha IDN no ofisiál PNTL sira ba mós sidadaun sivíl ne’ebé prepara atu ba sai hanesan Dretór Jerál iha dipolmata internasionál sira.
Jornalista: Hortencio Sanchez
Editór : Zezito Silva

