Udan impede projetu komunitária 12 iha Ermera
DILI, 01 fevereiru 2023 (TATOLI)–Diretór Servisu Edukasaun Munisípiu Ermera (DSEME), Eduardo Martins, konsidera projetu komunitária 12 to’o agora paradu tanba impaktu hosi udan boot ne’ebé difikulta transporte defisil tebes atu transporta materiál ba eskola sira.
Notísia Relevante: MEJD prevee millaun $1,3 hadi’a sala aula 63 iha Ermera
Bazeia ba mudansa klimátika ne’ebé akontese iha munisípiu Eremera, nia dehan, ne’e dirasaun realiza ona enkontru ida ho grupu komunitária sira hodi deside estende prosesu reabilitasaun eskola 12 ba fulan tolu tan.
“Ami halo ona enkontru horisehik ho maluk sira hosi grupu komunitária hodi estende tan prosesu reabilitasaun ba eskola 12 ne’ebé tama iha projetu komunitária ne’e ba fulan tolu tan, hahú hosi janeiru to’o marsu tinan ida-ne’e,” Eduardo Martins hateten ba Agência Tatoli liuhosi telefónika, kuarta ne’e.
Desizaun estende tempu ne’e tanba bazea ba kontratu ne’ebé halo ona loloos ninia durasaun tempu atu konklui ne’e to’o de’it setembru no outubru 2022.
Maibé, nia dehan, tanba mudansa klimátika konstrusaun ne’e hetan tiha adiantamentu to’o ohin loron ba prosesu reabilitasaun sai paradu, tanba ne’e dirasaun servisu edukasaun Munisipál husu atu estende tempu ba fulan tolu tan.
“Ita deside sxtende tempu prosesu reabilitasaun to’o fulan marsu ne’e, tanba ita garante bele finaliza tanba eskola 12 ne’e kuaze iha ona 26% to’o 50%,” nia hateten.
Eskola 12 ne’ebé sei iha hela faze reabilitasaun ne’e kompostu hosi ensinu báziku 10 no ensinu sekundáriu jerál no tékniku vokasionál rua (2).
Entre eskola 12 ne’e iha eskola 10 mak tama ona iha levantamentu faze daruak ho progresu fíziku 50%, enkuantu eskola EBF rua foin mak atinje pagamentu faze dahuluk kompostu hosi EBF Lisapat 26% no EBF Katrai Kraik 27%.
Nia informa, dadus eskola iha Ermera ne’ebé tama iha projetu komunitária ne’e hamutuk 21 mak tuir progresu fíziku ne’ebé identifikadu iha eskola sia (9) mak konklui ona. maibé eskola lima maka hetan ona inaugurasaun faze dahuluk hamutuk ho eskola 94 ne’ebé identifikadu iha territóriu nasionál no eskola haat sei tama ba faze daruak inaugurasaun.
“Purtantu, eskola 12 maka daudaun ne’e iha hela prosesu reabilitasaun nia laran,” nia dehan.
Notísia Relevante: ADN ko’a fundu 8% hosi orsamentu projetu komunitária
Jornalista : Tomé Amado
Editór : Cancio Ximenes
