Estudante Manufahi 157 ne’ebé asesu bolsa méritu iha ona konta bankária
DILI, 03 fevereiru 2023 (TATOLI)–Diretór Servisu Edukasaun Munisípiu Manufahi (DSEMM), Vitorino do Carmo, hateten oras ne’e daudaun estudante iha Manufahi hamutuk na’in-157 ne’ebé asesu bolsa méritu ne’e hetan ona sira-nia konta bankária.
Notísia Relevante: PN husu MEJD investiga implementasaun bolsa méritu tanba iha manipulasaun
“Ita sei hela estudante lubuk ida kuaze 670 mak seidauk hetan sira-nia konta bankária, oras ne’e daudaun sira sei trata hela iha banku nasionál Komérsiu Timor-Leste (BNCTL), maibé estudante 157 iha ona konta bankaria,” Diretór Vitorino hateten ba Agência Tatoli liuhosi telefónika sesta ne’e.
Nia dehan, estudante na’in-157 ne’ebé hetan ona konta bankária ne’e tanba sira-nia dokumentu kompletu no balun mós dokumentu hosi inan-aman sira-nian hodi fasilita sira atu hetan lalais, tanba estudante sira-ne’e ninia dokumentu hotu submete ona ba nasionál atu hein halo de’it prosesu.
Maibé ba estudante sira-ne’ebé mak sei kontinua prosesa hela sira-nia konta bankária iha BNCTL ne’e, husu atu trata ho lalais atu nune’e bele submete ba edukasaun munisipál hodi haruka ba nasionál.
Entretantu, totál estudante iha Manufahi ne’ebé identifikadu ona tama iha kategoria mellór klasifikadu ne’e hamutuk na’in-827, maibé nia kontinua hein nafatin prosesu hotu ne’ebé mak Edukasaun Nasionál sei rezolve hela relasiona ho asuntu iregularidade sira kona-ba valór ne’ebé deskonfia iha manipulasaun.
“Ita la tama iha ekipa ne’ebé Ministériu Edukasaun kria ona maibé ita fó fiar ba sira atu rezolve ho lalais, asuntu sira ne’e atu bele atribui ona prémiu bolsa méritu ne’e ba ita-nia oan sira,” nia dehan.
Tanba planu atribuisaun bolsa méritu ne’e programa 2022 nian, ne’ebé Ministériu Edukasaun identifika ona estudante iha territóriu nasionál hamutuk 13.000-resin, maibé to’o agora estudante sira-ne’e seidauk hetan de’it sira nia diretu.
Jornalista : Tomé Amado
Editór : Cancio Ximenes
