DILI, 03 fevereiru 2023 (TATOLI) – Ministra Negósiu Estranjeiru no Kooperasaun (MNEK) Adalzija Albertina Xavier Reis Magno, partisipa iha reuniaun Konsellu Kordenasaun ASEAN ba dala-32 hanesan observadora.
Partisipasaun Timor-Leste nian, hanesan momentu importante no istóriku tanba foin sai hanesan observadór bainhira nasaun membru sira simu Timor–Leste ba membru ASEAN iha tinan kotuk maibé seidauk full member maibé bele partisipa iha reuniaun nível altu sira.
“Reuniaun ne’e hala’o durante loron-rua, hahú 03-04 fevereiru, iha Sekretaridau ASEAN Jakarta, Timor-Leste hanesan observadór de’it tanba seidauk sai membru permanente, maibé ita sai ona família ida iha ASEAN”, tenik iha komunikadu ne’ebé Agência TATOLI asesu hosi media MNEK, ohin.
Iha okaziaun ne’e, Ministra Magno sei hala’o mós enkontru bilaterál ho Vise-Primeiru Ministériu Negósiu Estranjeiru no Kooperasaun Internasionál Kamboja nian, Prak Sokhonn, hodi diskute kestaun bilaterál, inklui Timor-Leste nia adezaun ba ASEAN, mobilidade traballu, diversifikasaun ekonómika no seluk tan.
Aleinde ne’e, sei enkontru mós ho Sekretáriu Estadu Negósiu Estranjeiru Filipina nian, Enrique Manalo, hodi agradese Governu Filipina ba apoiu hotu ne’ebé fó ona ba Timor-Leste, liuliu durante prosesu adezaun Timor-Leste nian ba ASEAN.
Nune’e mós, Ministra Adaljiza sei iha tan enkontru bilaterál ho Ministru Negósiu Estranjeiru Laos Saleumxay Kommasith no Ministru Negósiu Estranjeiru Brunei Darussalam nian, Erywan bin Pehin Yusof, hodi reforsa liután relasaun bilaterál sira ne’ebé mak iha ona, liuhosi esplora liután área kooperasaun sira iha tempu oin mai entre nasaun rua ne’e.
Jornalista: Hortencio Sanchez
Editór : Zezito Silva
