DILI, 06 fevreiru 2023 (TATOLI) – Prezidente Interinu Liga Futeból Timor-Leste (LFTL) Octavio da Conseição, dehan atividade LFTL la’o ona maibé Federasaun Futeból Timor-Leste (FFTL) seidauk transfere orsamentu ba konta liga nian.
“Loloos FFTL tenke transfere ona osan 40% mai orgaun liga, tanba liga nia funsionamentu administrasaun la’o ona iha fulan kotuk to’o agora, kuaze klube 10-resin mak rejistu ona sira-nia jogadór”, Octavio dehan ba Agência TATOLI, iha edifisiu Sekretariu Estadu Juventude no Desportu (SEJD) Lecidere, ohin.
“Agora sira la transfere osan mai ami, ami atu halo servisu oinsa karik, maibé ami nafatin hein atu sira bele transfere osan ne’e mai ami”, nia dehan.
Ho asuntu ne’e, TATOLI tenta konfirma ho parte FFTL maibé sei okupadu ho servisu esensiál balun tanba ne’e seidauk fó komentáriu.
Dadaun ne’e, Governu liuhosi SEJD transfere ona orsamntu hamutuk rihun $240 ba konta FFTL atu bele manda ba konta LFTL nian, hodi bele finansia ba atividade liga.
Hosi orsammentu Governu nian, FFTL mós apoiu orsamentu ba LFTL hamutuk rihun $200 ho nune’e totál orsamentu ba liga époka 2022-2023 hamutuk rihun $440.
Tuir akordu ne’ebé FFTL-LFTL halo iha tinan kotuk, tenke transfere uluk 40% hosi orsamentu rihun $240 ne’ebé apoiu hosi SEJD ba LFTL hodi asegura funsionamentu administrasaun maibé ate agora FFTL seidauk halo trasnferénsia maske SEJD transfere ona ba konta FFTL iha tinan kotuk.
Entretantu, tuir kalendáriu ne’ebé fó sai ona, liga sei halo abertura iha 17 fevereiru iha Estádiu Munisipál Dili.
Jornalista: Hortencio Sanchez
Editór : Zezito Silva
