MEJD públika ona dadus estudante 13.517 sai mellór klasifikadu
DILI, 06 fevereiru 2023 (TATOLI)–Ministériu Edukasaun Juventude no Desportu (MEJD) apublika ona dadus rezultadu estudante mellór klasifikadu hamutuk 13,517 iha territóriu nasionál mak iha diretu atu hetan bolsa méritu iha fulan ida-ne’e.
Notísia Relevante: PN husu MEJD investiga implementasaun bolsa méritu tanba iha manipulasaun
Diretór Jerál Edukasaun Ensinu iha MEJD, Luis Manuel da Costa Fernandes, hateten hafoin liuhosi prosesu naruk ida-ne’ebé Ministériu Edukasaun tenke halo ezersisiu mak atu verifika ho didi’ak dadus estudante sira-ne’ebé kada eskola sira submeter ba MEJD.
Hosi rezultadu ikus ne’ebé hetan duni ninia konkluzaun hatudu katak estudante ne’ebé iha direitu ba bolsa méritu ne’e iha estudante hamutuk 13.517.
“Ita-nia estudante sira-ne’ebé tama iha mellór klasifikadu hodi hetan bolsa méritu ne’e Ministériu fahe ba parte tolu. bolsa méritu nivel nasionál, nivel munisipál no nivel eskolár ba ensinu báziku, ensinu sekundáriu jerál no ensinu sekundáriu tékniku vokasionál,” diretór ne’e hateten ba jornalista sira iha salaun VIP Ministériu Edukasaun Juventude no Desportu, Vila Verde, segunda ne’e.
Hosi rezultadu ne’ebé Ministériu anunsia daudaun ne’e kategoria ba klasifikasaun prémiu mak hanesan bolsa méritu ba ensinu báziku nivel nasionál tinan 2022 selu ba terseiru siklu nono ano, ensinu báziku primeiru klasifikadu $5.000, segundu klasifikadu $4.000 no terseiru klasifikadu $3.000.
Ba bolsa méritu ensinu sekundáriu jerál nivel nasionál tinan 2022 selu ba désimu segundu ano primeiru klasifikadu $5.000, segundu klasifikadu $4.000 no terseiru klasifikadu $3.000, nune’e atribuisaun bolsa méritu ba ensinu sekundáriu tékniku vokasionál nivel nasionál tinan 2022 selu ba désimu segundu ano primeiru klasifikadu $5.000, segundu klasifikadu $4.000 no terseiru klasifikadu $3.000.
Enkuantu bolas méritu ensinu báziku nivel munisipál tinan 2022 selu ba terseiru siklu nono ano primeiru klasifikadu $2.250, segundu klasifikadu $2.000, terseiru klasifikadu $1.950, kuatru klasifikadu $1.800 no kintu klasifikadu $1.600.
Bolsa méritu ba ensinu sekundáriu jerál nivel munisipál tinan 2022 selu ba désimu segundu ano no hosi primeiru klasifikadu $2.250, segundu klasifikadu $2.000, terseiru klasifikadu $1.950 kuatru klasifikadu $1.800 no kintu klasifikadu $1.600.
Bolsa méritu ba ensinu sekundáriu tékniku vokasionál nivel Munisipál tinan 2022 selu ba estudante désimu segundu ano primeiru klasifikadu $2.250, segundu klasifikadu $2.000, terseiru klasifikadu $1.950, kuatru klasifikadu $1.800 no kintu klasifikadu $1.600.
Bolsa méritu ensinu sekundáriu jerál nivel eskolár tinan 2022 selu ba estudante désimu segundu ano, hosi primeiru klasifikadu $1.000, segundu klasifikadu $650 no Terseiru klasifikadu $500.
Entretantu, ba ensinu sekundáriu tékniku vokasionál nivel eskolár selu ba estudante désimu segundu ano, hosi primeiru klasifikadu $1.000, segundu klasifikadu $650, Terseiru klasifikadu $500.
Nune’e mós bolsa méritu ba ensinu báziku nivel eskolár terseiru siklu nono ano tinan 2022 selu ba estudante primeiru klasifikadu $1.000, segundu klasifikadu $650 no Terseiru klasifikadu $500.
Bolsa méritu ba ensinu sekundáriu jerál nivel eskolár selu ba estudante pasajen de klase hosi désimu primeiru ano no désimu segundu ano tinan 2022, hosi primeiru klasifikadu $600, segundu klasifikadu $550, terseiru klasifikadu $500, kuatru klasifikadu $430 no kintu klasifikadu $400.
Bolsa méritu ensinu sekundáriu tékniku vokasionál nivel eskolár ba estudante pasajen de klase désimu primeiru ano ba désimu segundu ano tinan 2022 nian, primeiru klasifikadu $600, segundu klasifikadu $550, terseiru klasifikadu $500, kuatru klasifikadu $450 no kintu klasifikadu $400.
Enkuantu bolsa méritu ba ensinu báziku nivel eskolár tinan 2022 selu ba pasajen de klase primeiru siklu kuatru ano nian, primeiru klasifikadu $600, segundu klasifikadu $550, terseiru klasifikadu $500, kuatru klasifikadu $450 no kintu klasifikadu $400.
Atu hatene kona ba sumáriu orsamentu ne’ebé atu atribui estudante sira mak hanesan primeiru bolsa méritu ba ensinu báziku, selu ba terseiru siklu nono ano iha estudante ema ho totál orsamentu hamutuk $12.000, ba bolsa méritu ensinu sekundáriu jerál no tékniku vokasionál nivel nasionál selu ba désimu segundu anu $24.00 ba estudante na’in-neen (6).
Iha mós bolsa méritu ba nivel munisipál tinan 2022 selu ba estudante terseiru siklu nono ano iha estudante na’in 70 mak hetan direitu ho totál orsamentu $137.200, bolsa méritu ba ensinu sekundáriu tékniku vokasionál nivel munisipál selu ba estudante na’in 70 ho totál orsamentu hamutuk $137.200, enkuantu ba ensinu sekundáriu jerál nian iha ema na’in-288 ho totál orsamentu $240.750.
Entretantu bolsa méritu ba ensinu sekundáriu tékniku vokasionál selu ba désimu segundu ano iha estudante 177 ho totál orsamentu hamutuk$132.750, bolsa méritu ensinu báziku ba nivel eskolár terseiru siklu nono ano iha estudante hamutuk na’in 1.068 ho totál orsamentu $801.00, Bolsa méritu ensinu sekundáriu jerál nivel eskolár ba pasajen de klase hosi désimu primeiru anu ba désimu segundu anu tinan 2022 hamutuk estudante 530 ho orsamentu $267. 500.
Bolsa méritu ensinu sekundáriu tékniku vokasionál nivel eskolár pasajen de klase hosi désimu primeiru ano ba désimu segundu ano hamutuk 295 ho totál orsamentu $147.500.
Bolsa méritu ensinu báziku nivel eskolár selu ba ezame pasajen de klase hosi segundu siklu nono ano hamutuk 5.140 ho orsamentu millaun $2.570.
Bolsa méritu ba ensinu báziku selu ba pasajen de klase kuatru ano ba kintu ano ho totál estudante 5.800 ho orsamentu hamutuk millaun $2.900.
Koordenadór Unidade Kurríkulu Nasional (UKN), Mateus dos Rei, hateten ba estudante finalista 2022 ne’ebé mak tama iha mellór klasifikadu hodi hetan bolsa méritu ne’e sira-nia valór foti de’it hosi ezame nasionál ne’ebé mak realiza iha loron 24-26 outubru 2022 liu ba.
Hosi valór sira-ne’e mak determina estudante ne’e atu hetan direitu ba bolsa méritu, tanba mosu kazu sira hanesan iha eskola ensinu sekundáriu jerál Fernando La Sama de Araújo Ainaro iha estudante ida ho valor boot la sai primeiru klasifikadu ne’e, tama ninia valór ne’e eskola tau hamutuk entre ezame lokál ho ema nasionál hotu. loloos valor ne’ebé merese atu fó ba estudante mellór klasifikadu ida-ne’e haree de’it hosi rezultadu ezame nasionál nian de’it.
“Ha’u hakarak dehan tan iha mós kazu seluk akontese ba ita-nia alin feto ida hosi eskola Sagradu Coração de Jesus (SAKROJES) Becora ne’ebé antes ne’e dehan nian maka hetan valór di’ak ka aas liu ne’e tanba ninia nota soma hamutuk hosi entre rezultadu ezame nasionál ho nota eskola nian. maibé depois verifika didi’ak fali nia la tama iha mellor klasifikadu,” nia dehan,
Ne’ebé, bolsa méritu ne’ebé atu fó ba estudante ida-ne’e foti de’it hosi valór ezame nasionál ne’ebé nota hosi eskola nian sei la soma hamutuk ho nota hosi ezame nasionál.
Ne’eduni estudante ne’ebé hetan klasifikasaun di’ak hosi nivel nasionál ne’e ema na’i- tolu hosi primeiru klasifikadu to’o terseiru klasifikadu, segundu hosi nivel munisipál ne’e hosi Primeiru to’o kintu lugar iha ema na’in-lima depois hosi nivel eskolár nivel hosi primeiru to’o terseiru klasifikadu iha ema na’in-tolu.
Estudante bolsa méritu 500-resin seidauk iha konta bankária
Entretantu, Diretór Servisu Edukasaun Munisípiu Dili (DSEMD), Carlito Soares, informa estudante bolsa méritu hamutuk 500-resin iha Dili seidauk hetan konta bankária.
Asuntu kona ba problema konta bankária ne’e hato’o mós hosi Diretór edukasaun Munisipál sira ne’ebé aprezenta ona ba Ministru Edukasaun Juventude no Desportu katak estudante 13.000-resin ne’ebé tama iha kategoria mellor klasifikadu atu hetan bolsa méritu ne’e barak mak to’o agora seidauk hetan konta bankária.
Nia relata estudante bolsa méritu iha Dili kompostu hosi ensinu báziku primeiru siklu to’o terseiru siklu la konta ho estudante finalista nian, kuaze iha estudante hamutuk 975 mak identifikadu atu hetan bolsa méritu maibé to’o agora barak mak seidauk iha konta bankária.
“Ita-nia estudante kuaze 300-resin de’it mak trata ona sira-nia konta bankária maibé kuaze 500- resin mak seidauk iha konta bankária,” nia dehan.
Estudante lubuk ida mak seidauk trata sira-nia konta bankária iha Banku Nasionál Komérsiu Timor-Leste (BNCTL) ne’e tanba tinan seidauk to’o depois atu uza inan aman nian dokumentu maibé barak mak mate ona balun laiha dokumentu, estudante balun hela ho sira-nia avó laiha ema ida mak ajuda atu trata sira-nia dokumentu.
Nia husu ba ekipa konjunta inklui Diretór Jerál, Diretór nasionál sira-ne’ebé tutela ba asuntu bolsa méritu ne’e, diretór eskola sira superintendente atu buka solusaun ruma hodi rezolve problema sira-ne’ebé maka estudante sira enfrenta ne’e, tanba iha Dili de’it mak hetan ona difikuldade hanesan ne’e satán iha munisípiu sira hetok defisil liután.
Jornalista : Tomé Amado
Editór : Cancio Ximenes
