Ekipa jestaun merenda eskolár iha Baucau tuir formasaun
BAUCAU, 07 janeiru 2023 (TATOLI) – Ekipa jestaun programa merenda eskolár na’in-35 tuir formasaun manuál implementasaun durante loron rua hahu tersa too kuarta, 07-08 fevereiru antes implementa iha munisípiu Baucau.
Diretór Servisu Munisipál Edukasaun Baucau, Augosto Ornai Ximenes, esplika, formasaun refere objetivu atu fahe informasaun kona-bá manuál programa merenda eskolár ba grupu implementadór sira iha tinan-2023 ne’e.
“Programa ida-ne’e ninia benefísiu direita ba estudante sira maibé fó serbisu kiik ba ekipa jestaun programa ho kuziñeira sira hamutuk na’in-306,” Diretór Servisu Munisipál Edukasaun Baucau hateten iha Vila Nova, tersa ne’e.
Hosi númeru refere kompostu hosi pre-eskolár no ensinu báziku sira-ne’ebé hafoin remata formasaun sei kontinua asina kontratu servisu ho Autoridade Munisípiu Baucau molok implementa programa refere iha tempu badak.
Prezidente Autoridade Munisípiu Baucau, Olivio ‘Bou-Lesa’ Freitas, enkoraja grupu implementadór sira tenke utiliza orsamentu merenda eskolár ho responsabilidade nune’e estudante sira bele hetan benefísiu dereita hosi programa refere.
“Estudante sira-ne’e Baucau nia oan duni, iha futuru sira mak sei sai líder ba nasaun, entaun tenke fó hahaan ba sira nune’e hetan saude di’ak nune’e sira kontinua iha vontade aprende iha eskola,” Bou-Lesa argumenta.
Tuir manuál implementasaun tinan-2023 hanesan bandu ba funsionáriu públiku inklui jestór eskola hotu atu jere programa refere ne’ebé orsamentu sei transfere dereita ba konta bankária grupu EJP-Merendár Ekolár no sei monitoriza hosi diretiva eskolár.
EJP-Merendár Eskolár kompostu koodernadór na’in-ida, pontu fokál nain-tolu, tezoreira na’in-ida inklui kuiziñeiru tuir establesementu dapur iha kada eskola.
Autoridade Baucau estabelese grupu EJP hamutuk totál 35 hodi implementa programa merenda eskolár kompostu ensinu báziku sentrál hamutuk 26, ensinu báziku filiál hamutuk 180-resin inklui edukasaun pre-eskolár 34 ho totál benefisiáriu purvolta 32.400 ho tótal orsamentu hamutuk millaun $2.3.
Jornalista : Natalino Belo
Editór : Evaristo Soares Martins
