DILI, 07 fevereiru 2023 (TATOLI) – Governu liuhusi Ministeriu Finansa halo ona levantamentu, iha inísiu fevereiru ne’e, osan husi Fundu Minarai ho montante millaun $300 husi totál biliaun $2,1 ne’ebé mak Parlamentu Nasionál aprova ona liuhusi Lei Orsamentu Jerál Estadu (OJE) 2023 no promulga husi Prezidente Repúblika, José Ramos-Horta, iha 21 dezembru 2022.
“To’o iha loron 06 fulan-fevereiru, ezekusaun reál OJE 2023 ba Administrasaun Sentrál ein termu nominál atinji ona millaun $38,8 husi totál orsamentu biliaun $2,1”, relata nota ne’ebé Agência Tatoli asesu, tersa ne’e.
Iha tinan kotuk,Governu Dualuk konsege ezekuta biliaun $1,743 husi totál orsamentu $2,2. Valór nominál bilaun $1,743 ne’e mak aas liu iha istória Timor-Leste dezde país ne’e restaura ninia independénsia no konsege ultrapassa ezekusaun reál iha tinan 2016 iha ne’ebé Governu konsege ezekuta biliaun $1,630.
Enkuantu, iha tinan 2022 Governu halo levantamentu osan husi Fundu Minarai hamutuk biliaun $1,4 ka 90% husi totál biliaun $1,55 ne’ebé mak Parlamentu Nasionál aprova liuhusi Lei OJE Retifikativu 2022.
Montante biliaun $1,55 ne’e esklui ona Fundu Kombatetente Libertasaun Nasionál biliaun $1 ne’ebé mak tinan kotuk Tribunál Rekursu deklara Inkonstitusionál no automatikamente eliminadu husi konta públika.
Notísia relevante: Ezekusaun OJE 2023 iha semana datoluk janeiru ho valór $282.535
Jornalista : Antónia Gusmão
Editora: Maria Auxiliadora
