DILI, 06 fevereiru 2023 (TATOLI) – Organizasaun Internasionál ba Migrasaun (IOM-sígla ingles), iha Timor-Leste, kontinua hatudu sira-nia komitmentu hodi fasilita formasaun kona-ba sistema informasaun no análiza dadus servisu migrasaun nian ka Migration Information and Data Analysis System (MIDAS-sígla ingles ba ofisiál servisu migrasaun sira iha Postu Migrasaun Motamasin Suai, Munisípiu Covalima.
Diretór Jerál Servisu Migrasaun, Superintendente Asistente Polísia, Luis Soares Barreto, hateten formasaun ne’e atu kapasita ajente no ofisiál migrasaun sira oinsá atu entende di’ak liu sistema MIDAS ne’e.
“Ohin ita halo abertura manuál kursu kona-ba sistema analiza informasaun no dadus migrasaun nian hanaran MIDAS ba ita-nia membru Servisu Migrasaun hosi Polísia Nasionál Timor-Leste (PNTL) no sivíl hamutuk nain-15, ne’ebé halo knar iha Postu Integradu Fronteira Salele no Aeroportu Suai, nune’e bele dezenvolve kapasidade hodi kapasita formasaun sistema MIDAS ne’ebé adekuadu ba membru sira”, Luis Barreto dehan liuhosi komunikadu ne’ebé Agência TATOLI asesu, ohin.
Nia dehan, formasaun ne’e realiza tanba iha kooperasaun di’ak entre Vise-Ministru Interiór, Antonio Armindo, ho Guvernu Austrália liuhosi projetu IOM iha Timor-Leste hodi haforsa jestaun fronteira iha Timor-Leste.
“Formasaun ne’e importante tebes tanba bainhira membru sira hatene ona sei fasilita di’ak liután ita-nia atendementu tanba sistema ne’e hodi halo monitorizasaun eletronikamente ba pasajeiru sira ne’ebé tama no sai liuhusi postu integradu migrasaun nian iha territóriu nasionál”, nia salienta.
Nia hatutan, durante semana ida nia-laran formadór sira sei hanorin kona-ba teória no prátika, hafoin iha semana oin mai hahú monta ona aparellu sistema MIDAS iha Postu Migrasaun Motamasin-Suai, hodi nune’e hahú ona kontrolu ba pasajeiru ho sistema MIDAS ne’e rasik.
Iha biban ne’e Luis Barreto mós agradese ba Governu liuhosi Vise-Ministru Interiór nia esforsu hodi halo relasaun bilaterál ho Governu Austrália hodi ajuda fundus ba melloramentu sistema migrasaun nian liuhosi IOM.
Jornalista: Hortencio Sanchez
Editór : Zezito Silva
