Manufahi, 07 fevereiru 2023 (TATOLI)–Prezidente Partidu Congresso Nacional de Reconstrução de Timor (CNRT sigla Portugues), Kay Rala Xanana Gusmão, enkoraja estudante na’in-14 ne’ebé simu graduasaun dahuluk iha Institutu Ensinu Superiór Privadu Boaventura Timor-Leste (IBTL) ne’e atu kontinua estuda no estuda beibeik.
Xanana Gusmão hatutan. Estudante tenke estuda no estuda nafatin hafoin simu graduasan, tanba ho estuda mak estudante ida bele ajuda dezenvolvimentu rekursu umanu, atu hasa’e kualidade edukasaun iha Timor-Leste.
Notísia Relevante: IBTL realiza graduasaun etapa dahuluk ba estudante 20-resin iha 07 fevereiru
“Ha’u bolu atensaun ba foinsa’e na’in-14 kompostu hosi feto na’in-tolu (3) no mane na’in-11 ne’ebé foin simu graduasaun iha IBTL Luak munisipiu Manufahi ne’e, atu kontinua estuda makaas tanba problema edukasaun ne’e presiza atu diskute kle’an no buka atu rezolve ho lalais, nune’e bele prepara joven atu dezenvolve TL ba future,” Líder Istóriku Kay Rala Xanana Gusmão hateten liuhosi komunikadu imprensa ne’ebé Agência Tatoli asesu, tersa ne’e.
Eis Primeiru-Ministru ne’e hateten foin lalais nia parte hala’o ona reuniaun ho akadémiku sira husi Universidade no Ensinu Superiór akreditadu iha Timor-Leste kuaze ema na’in 200 liu mak partisipa iha reuniaun ne’e. nia bolu ona atensaun atu servisu hamutuk hodi hadi’a kualidade ensinu superiór sira iha Timor-Leste.
Tanba Xanana rekoñese katak, kualidade edukasaun iha Timor-Leste, sai problema boot ida, ne’ebé tenke rezolve. Problema ne’e akontese, tanba dosente sira la fokus iha universidade ida ne’ebé sira haknaar-aan ba tanba sira hanorin tutan tan iha universidade no institutu sira seluk
Maibé Xanana sente orgullu, iha Munisipiu Manufahi iha ona Institutu Ensinu Superiór Privadu IBTL ne’ebé harii hosi veteranu sira ho objetivu ida hakarak atu eduka foinsa’e timoroan sira bele estuda no apreende siénsia oioin ne’ebé bele hasa’e sira-nia koñesimentu atu servi sira-nia an, família, povu no nasaun ida-ne’e
“Ha’u apresia boot tebes ba Prezidente Fundasaun Riak Leman ho nia ekipa, Gil Oan Soru no sira seluk ba imi-nia hanoin ne’e. Tanba iha konstrusaun nasaun, partisipasaun tenke hosi sidadaun mós. Ida-ne’e hatudu sidadaun hanoin atu partisipa iha konstrusaun nasaun nian,” Xanana hateten bainhira partisipa primeiru serimónia graduasaun baixarelatu ba Fakuldade Ekonomia no Enjeñaria iha Institutu Boaventura Timor-Leste (IBTL) Luak, Manufahi.
Kay Rala Xanana Gusmão agradese ba Veteranu Rejiaun III no IV ne’ebé hamutuk harii ona Institutu Boaventura Timor-Leste (IBTL) hodi selu ona povu nia sakrifisiu luta hodi kontribui ba prosesu konstrusaun estadu Timor-Leste, kontribuisaun veteranu nian ne’e hola parte ona iha kontribuisaun ba konstrusaun nasaun nian ne’ebé pertense ba sidadaun hodi hamutuk harii nasaun tuir prinsípiu ukun an nian.
Notísia Relevante: IBTL simu estudante bolsa hakbiit na’in-rua no IPDC na’in-20
Jornalista : Tomé Amado
Editór : Cancio Ximenes
