MEJD husu BNCTL aselera loke estudante mellór klasifikadu nia konta bankária
DILI, 08 fevereiru 2023 (TATOLI)–Ministru Edukasaun Juventude no Desportu (MEJD), Armindo Maia, hateten Governu liuhosi MEJD sei ko’alia ho autoridade Banku Nasionál Komérsiu Timor-Leste (BNCT) atu loke tan espasu ba estudante mellór klasifikadu sira bele trata lalais sira nia konta bankária.
Notísia Relevante: PN bolu urjente Ministru Edukasaun atu esplika implementasaun bolsa méritu
“Ita mós konsidera duni katak atendimentu BNCTL nian ba prosesu tratamentu konta bankária ne’e maka limitadu duni. Maibé, ha’u sei ko’alia ho BNCTL iha tempu besik ne’e, atu loke liu tan posibilidade no espasu ba ita-nia estudante sira atu bele trata lalais sira-nia konta bankária,” Ministru Edukasaun ne’e hateten ba jornalista sira hafoin ramata reuniaun Konsellu Ministru iha Palásiu Governu, kuarta ne’e.
Esforsu ne’ebé Ministériu Edukasaun sei halo hodi husu posibilidade banku nian atu loke tan espasu atendimentu ba prosesu loke konta bankária ne’e, tanba konsidera orsamentu ne’ebé mak prevee ona ba estudante melloó klasifikadu hamutuk na’in-13.517 ne’e, tanba haree ba prosesu pagamentu ne’ebé labele liuhosi fulan marsu no abríl.
Tanba ne’e, nia dehan, Ministériu Edukasaun hakarak hetan apoiu másimu hosi BNCFTL nian atu bele rezolve lalais konta bankária ba estudante sira iha territóriu nasionál iha fulan ida-ne’e.
Diretór Jerál Edukasaun Ensinu Ministériu Edukasaun Juventude no Desportu, Luis Manuel da Costa Fernandes, hateten dezde fulan-dezembru mai to’o ohin loron, dirijente másimu Ministériu Edukasaun sira kontinua servisu hamutuk ho diretór edukasaun Munisipál sira atu orienta alunu sira iha prosesu loke sira-nia konta bankária iha Banku Nasionál Komérsiu Timor-Leste (BNCTL).
Kuaze estudante lubuk ida mak trata hotu ona sira-nia konta bankária no oras ne’e iha ona prosesu rekapitulasaun depois sei entrega ba BNCTL hodi halo transferénsia osan ba konta bankária estudante ida-idak nian.
Tuir nia, bainhira atu loke konta bankária, Ministériu Edukasun asina ona kontratu ho BNCTL atu haree servisu ida-ne’e no ida-ne’e organiza di’ak hela, agora la’o hela maibé presiza prolonga tan tempu tanba la fasil ema hotu atu loke konta bankária iha tempu ida-ne’ebé determinadu.
“Ha’u hakarak dehan servisu iha Munisípiu hotu-hotu kontinua la’o nafatin hela, to’o tempu ruma sei halo transferénsia ba sira-nia konta bankária,” nia hateten.
Tamba ne’e, MEJD sei aselera prosesu ida-ne’e no garante katak tempu besik estudante sira sei konklui tratamentu konta bankária, atu nune’e banku bele halo ona prosesu transfere osan ba sira-nia konta bankária.
Programa bolsa méritu ne’e rasik aprova iha lei Grande Opsaun Planu (GOP) 2023 hosi Parlamentu Nasionál depois atribui mai Ministériu Edukasaun Juventude no Desportu atu ezekuta.
Maibé MEJD Edukasaun mós hasai dekretu-lei ida kona ba medida atu apoiu estabelesimentu ba ensinu edukasaun ensinu báziku, ensinu sekundáriu públiku partikulár atribuisaun bolsa méritu ba alunu sira.
Dekretu-lei ne’e rasik hatuur ona iha lei númeru 35/2022 inklui mós diploma Ministeriál ho númeru 43/2022, ne’ebé hasai iha loron 19 outubru.
Dekretu-lei no diploma Ministeriál ne’e atu regula prosedimentu kona-ba atribuisaun bolsa méritu ba estudante 13,517 iha territóriu nasionál ne’e.
Jornalista : Tomé Amado
Editór : Cancio Ximenes
