DNFM klarifika aimoruk sirup proxion seidauk rejistu iha Timor-Leste
DILI, 09 fevereiru 2023 (TATOLI) – Xefe Departamentu Jestaun Autorizasaun no Introdusaun Medikamentu, liuhusi Diresaun Nasionál Farmasia no Medikamentu (DNFM), iha Minitériu Saúde, Teodoro de Jesus, klarifika aimoruk sirup proxion durante ne’e importadór privadu no Governu seidauk hatama mai Timor Leste.
“Aimoruk sirup proxion ida ne’e importadór privadu no SAMES seidauk rejistu iha ita nia rain. Ha’u dehan ida ne’e tanba informasaun ne’ebé lansa iha media sosiál katak aimoruk sirup praxion iha nasaun viziñu indonézia ema komesa dada fila fali iha merkadu, klínika, ospitál no farmásia, hodi hapara ona produsaun no investigasaun komesa hahú, entaun ita Timor-Leste seidauk rejistu item ne’e, iha Diresaun Nasionál Farmasia no Medikamentu(DNFM)”, Teodoro de Jesus, informa ba TATOLI, ohin.
Nia dehan, aimoruk sirup proxion ne’e ba labarik sira tinan lima mai kraik mak konsumu, bainhira sira mear, maibé durante ne’e importadór privadu sira ne’ebé mak eziste iha ne’e inklui SAMES rasik seidauk hatama aimoruk ida ne’e.
Iha fatin hanesan Diretora Armazen Servisu Auotonomu Medikamentu Ekipamentu Saude Saturnina Ximenes, informa durante ne’e aimoruk sirup Praxion husi nasaun Indonézia laiha Armazem SAMES.
“SAMES atu informa ba públiku katak rumoris ne’ebé lansa iha media sosiál katak aimoruk sirup praxion ba labarik tinan lima mai kraik husi Indonézia sirkula ona iha ita nia rain, ba klínika privada sira ha’u ladún hatene kona-ba ida ne’e, maibé ba armajen SAMES aimoruk ida ne’e ita la iha”, Saturnina Ximenes dehan.
Nia hateten, aimoruk sirup praxion ne’e atu hanesan ho parasetamol sarope ba labarik sira, maibé iha SAMES ne’e husi kompaña Kilaban husi nasaun India laos husi kompaña Indonézia.
“Aimoruk ne’e ita haree hanesan parasetamol sarope, maibé aimoruk ne’ebé mak daudaun iha SAMES ne’e husi kompaña kilaban India nian, laos husi kompaña indonézia tanba ita nia armajen seidauk rai produtu ida sirup praxion”, nia afirma.
Durante SAMES halo akizasaun ba aimoruk sira ne’e husi kompaña oinoin, maibé seidauk hatama aimoruk sirup proxion husi nasaun Indonézia.
“Ami nia kompeténsia mak atu asegura saúde nasionál iha teritóriu laran tomak ho ida ne’e ami prepara aimoruk hotu liuhosi lista esensiál sira, katak ita hatama aimoruk mai hotuhotu asegura saúde públiku ba ema iha timor laran tomak, tanba ne’e ba komunidade sira labele tauk ba fasilidade saúde sira halo tratamentu”, nia konklui.
Jornalista : Felicidade Ximenes
Editór : Zezito Silva
