DILI, 09 fevereiru 2023 (TATOLI) – Treinadór selesaun nasionál Boxe Abilio Orlando dos Santos, dehan Federasaun Boxe Amadora Timor-Leste (FBATL) esforsu hela atu lori atleta na’in haat ne’ebé selesionadu ba SEA Games Kamboja ba halo tryout iha nasaun viziñu indonézia hafoin hakat ba kompetisaun iha fulan maiu.
“Tryout ne’e importante tebes atu ita bele hatene atleta sira nia kapasidade to’o ona iha ne’ebé, maibé federasaun osan laiha, koalia ona ho Konfederasaun Desportiva Timor–Leste (CDTL-sigla portugés) mós sira dehan osan laiha, entaun federasaun buka meiu hela atu husu patrosinadór balun ajuda ita ba halo tryout iha Indonézia depois mak liu ba kompetisaun”, treinadór ne’e ba Agência TATOLI iha Jináziu Dili, ohin.
Totál atleta Boxe atu ba partisipa iha SEA Games tinan ne’e na’in haat mak hanesan, Delio Mouzinho, Elidio da Conseição, Raimundo Galhos no Dovi Ramos.
Ho treinamentu ne’ebé másimu tebes treinadór ne’e garante sei hatudu rezultadu di’ak iha eventu rejionál ne’e.
Jornalista: Hortencio Sanchez
Editór : Zezito Silva
