Janeiru: Sentru Saúde Vera Cruz rejista labarik má nutrisaun hamutuk 163
DILI,09 fevereiru 2023 (TATOLI) – Sentru Internamentu Vera Cruz iha fulan janeiru rejistu labaraik sira ne’ebé mak hetan kazu má nutrisaun moderadu ho grave hamutuk 163.
“Ami rejistu no identifika labarik sira má nutrisaun ho kazu moderadu na’in 109, grave iha kazu 54, ita kompara ho labarik ne’ebé mak partisipa tetu iha fulan tomak ida ne’e, ita bele hatene ninia pursentu moderadu 11%, no grave iha 5%”, Koordenadór Programa Nutrisaun Sentru Saúde Vera Cruz Antonio da Cruz, informa ba jornalista iha Vera Cruz, ohin.
Nia dehan, dadus ne’ebé mak fó sai ne’e labarik sira iha má nutrisaun normál no moderadu identifika liuhosi tetu, durante halao tetu ne’e haree ba nia todan, todan ba moderadu ho todan ba grave, ida ne’e mak durante Sentru Internamentu Vera Cruz halo.
“Iha 2022 labarik ne’ebé mak mai tetu iha sentru internamentu vera cruz, totál labarik hamutuk 12.380 maibé sira ne’ebé mak todan hanesan normál ne’e iha 11.312, ka 91%, signifika nutrisaun ida ne’e normál, depois iha má nutrisaun moderadu, identifika labarik hamutuk 835 ka 7% no labarik ne’ebé má nutrisaun grave ne’e iha 226 ka 2%”, nia dehan.
Nia hautan, husi númeru ne’ebé mak iha ne’e laiha labarik ida mak mate, problema mak má nutrisaun ne’e aas, maibé suplementu plapinat F75 no F100 ne’ebé mak oferese ba labarik sira má nutrisaun ne’e agora laiha atu apoiu ba labarik má nutrisaun sira.
“Aihan planpinat laiha entaun iha ne’e halo de’it konselamentu ba inan sira oinsá atu utiliza aihan sira hanesan produtu lokál, hodi fó ba labarik sira para bele konsumu ho nutritivu, no konsumu ho di’ak no tuir oras, para inan sira kompriende ho di’ak hodi prepara aihan ne’ebé mak kualidade no nutritivu atu bele rekopera fila fali labarik sira ne’ebé monu má nutrisaun”, nia esplika.
Nia afirma, labarik ne’ebé mak maioria hetan má nutrisaun ne’e hahú husi idade fulan 6 to’o ba tinan lima mak afeta ba má nutrisaun maka’as.
Responsável Programa Nutrisaun iha Sentru Saúde Formoza, Ercio de jesus Doutel Sarmento, informa iha fulan janeiru Sentru Saúde Formoza totál tetu labarik hamutuk 3.109.
“Maibé ba labarik sira ne’ebé mak ho má nutrisaun iha na’in 32 maibé daudaun ne’e planpinat la iha estock, ami fahe informasaun ba inan sira para ba uma tein aihan lokál sira hanesan modo tahan fó ba labarik sira ne’ebé mak hetan má nutrisaun”, Ercio de jesus hateten.
Nia akresenta, labarik ne’ebé mak ho má nutrisaun moderadu iha 21, depois kategoria grave iha na’in 11, entaun totál mak hamtuk 32.
“Labarik ne’ebé mak hetan má nutrisaun ne’e ho idade 0 to’o tinan lima maibé husi sira ne’e laiha kazu mate”, nia hakotu.
Jornalista : Felicidade Ximenes
Editór : Zezito Silva
