Konstrusaun ba kampu FFTL iha ona prosesu konkursu internasionál

DILI, 09 fevereiru 2023 (TATOLI) – Prezidente Fedrasaun Futeból Timor-Leste (FFTL) Francisco Jerónimo, hateten konstrusaun ba kampu Fedarasaun Futeból Timor-Leste (FFTL) ne’ebé uluk ho naran koñesidu lapangan pramuka daudaun ne’e iha ona faze konkursu públiku ne’ebé loke direta hosi Federation International Football Assosiation (FIFA) ba kompaña internasionál sira.

“Kampu FFTL ne’e nia prosesu hotu ona, agora daudaun FIFA loke hela konkursu ba kompaña internasionál sira atu aplika se mak manán nia mak sei mai halo konstrusaun”, Prezidente dehan  ba Agência TATOLI iha Palasiu Governu, ohin.

Nia esplika, konsultór internasionál sira mai halo levantamentu dadus hotu ona ho nune’e hein de’it prosesu realizasaun ba konstrusaun kampu refere.

Kampu FFTL ne’e laiha kontratu arendamentu tanba Sekretariu Estadu Juventude no Desportu (SEJD) hamutuk ho Ministériu Justisa (MJ) atribui ona ba FFTL iha tinan kotuk.

Orsamentu ba konstrusaun kampu ne’e Prezidente la mensiona tanba buat hotu FIFA mak halo no FFTL hein simu de’it bainhira kampu prontu ona.

Kampu ne’e sei utiliza ba treinamentu selesaun nasionál seniór, juniór no juvenil FFTL nian.

Jornalista: Hortencio Sanchez

Editór : Zezito Silva