MAPKOMS sei lansa dizeminasaun informasaun nasionál iha Ermera
DILI, 09 fevereiru 2023 (TATOLI) – Ministru Asuntu Parlamentár no Komunikasaun Sosiál (MAPKOMS) Francisco Jerónimo, hateten tempu besik sei halo lansamentu ba dizeminasaun informasaun nasionál ba Autoridade Munisipál Ermera.
“Lansamentu ne’e ita sei halo iha tempu besik, se la marsu, bele mós iha abríl, tanba agora daudaun ami halo hela preparasaun tékniku no Primeiru-Ministru rasik konkorda ona ho lansamentu ne’e, objetivu prinsipál hosi lansamentu ne’e oinsa bele halo sensibilizasaun ba ita nia komunidade sira ho informasaun ne’ebé mak los”, ministru dehan ba jornalista-sira iha Palásiu Governu, ohin.
Nia esplika, Konstituisaun Repúblika Demokratika Timor–Leste artigu 40 koalia kona-ba Liberdade Koalia no Informasaun ninian no artigu 41 koalia kona-ba Liberdade Imprensa no komunikasaun sosiál ho nune’e sidadaun hotu iha direitu atu hetan informasaun loloos hosi Governu kona-ba prosesu hotu la’o iha nasaun laran.
Iha sorin seluk, Prezidente Autoridade Munisipál Ermera, Eusébio Salsinha reforsa, prontu atu halo lansamentu sensibilizasaun informasaun nasionál ne’e iha Ermera.
“Ohin ha’u ho ministru ko’alia ona oinsa mak ami nia preparasaun ba lansamentu ne’e rasik, atividade importante mak komunikasaun sosiál, sensibilizasaun ba públiku oinsa ita nia komunidade sira asesu ba informasaun ne’ebé los atu nune’e sira labele konsumu liu informasaun falsu sira ne’ebé espalla iha media sosiál”, prezidente autoridade konklui.
Jornalista: Hortencio Sanchez
Editór : Zezito Silva
