DILI, 10 fevereiru 2023 (TATOLI) – Ministériu Asuntu Parlamentár no Komunikasaun Sosiál (MAPKOMS) realiza sorumutu ho liña ministeriál hotu hodi koordena servisu hamutuk atu bele fó resposta ba preokupasaun públiku nian ne’ebé levanta hosi deputadu sira kada semana iha plenária Parlamentu Nasionál.
“Ohin realiza reuniaun ne’e atu atende kona-ba preokupasaun hirak ne’ebé ita nia deputadu sira levanta kada semana iha segunda no tersa, preokupasaun hirak ne’e ita presiza fó resposta ne’e mak ita halibur liña ministeriál hotu mai iha ne’e liuliu diretór jerál sira”, ministru MAPKOMS, Francisco Jerónimo dehan ba Agência TATOLI iha Pusat Budaya Dili, ohin.
Reuniaun ne’e atu koordena ho diretór jerál sira atu harii pontu fokál kada ministériu hodi servisu másimu liután atu bele responde preokupasaun deputadu sira nian.
“Preokupasaun deputadu sira nian ne’e mak dehan estrada maioria la di’ak, eskola la di’ak, problema sosiál sira ita nia komunidade sira hasoru no seluk tan, ida ne’e mak reuniaun ohin loron nian atu koalia ho diretór jerál sira atu harii pontu fokál kada ministériu hodi bele fó resposta mós ba preokupasaun deputadu sira nian, hodi fó benéfisiu ba ita nia komunidade sira iha área rural”, nia dehan.
Nia revela, reuniaun ne’e sei la para de’it iha ne’e maibé kada fulan neen tenke halo hodi koordena malu entre liña ministeriál hotu hodi aselera servisu iha baze ba populasaun sira.
Iha okaziaun ne’e Deputada Lidia Norberta dos Santos Martins ne’ebé partisipa mós iha enkontru ne’e hateten, koordenasaun entre liña ministeriál sira ne’e importante tebes tanba bele servisu hamutuk hodi fó resposta ba preokupasaun povu nian.
“Reuniaun ne’ebé MAPKOMS halo ne’e di’ak tebes tanba koordena ho liña ministeriál sira hodi bele fó resposta ba preokupasaun povu nian ne’ebé kada semana deputadu hotu levanta iha plenaria”, deputada konklui.
Jornalista: Hortencio Sanchez
Editór : Zezito Silva
